WILLEMSTAD – No ta bini ku un makutu básiko mas grandi pa e konsumidó ku un pòtmòni limitá. Wes a rechasá esaki ayera den un huisio sumario.

E Grupo di defensa Curaçaosche Agenturen i 27 kompania di importashon por mayó a hiba gobièrnu di Kòrsou dilanti di wes pa evitá ku lo a amplia e makutu básiko ku gruponan di produkto kompleto i artíkulonan ku no ta esensial.

Den luna di ougùstù gobièrnu a disidí pa amplia e makutu básiko pa enfrentá e krisis ekonómiko finansiero i e subidanan grandi di preis komo konsekuensia di entre otro e pandemia di covid.

Wes a akusá gobièrnu ku no a hasi un investigashon korekto for di tempu ku a introdusí makutu básiko na 2012. Tampoko no a investigá e nesesidat i e efektonan ku por spera ora pone e produktonan èkstra ku a apuntá awor aki den e makutu básiko.

Na ora di krea i aprobá e akuerdo Pais a aktua robes, no solamente pa loke ta trata e prinsipio di diligensia i e  motivashon, pero tambe ku e prohibishon arbitrario i e prinsipio di proporshon.

Esaki ta nifiká ku minister di Desaroyo Ekonómiko, Ruisandro Cijntje, no a aktua korekto ku e akuerdo ku mester a drenta na vigor 1 di sèptèmber 2022, pero a wanta ku esei en espera di e verdedikto aki.

Segun e wes ámtenarnan a spièrta e minister kaba den un nota interno ku e makutu básiko no ta e instrument adekuá pa personanan ku sueldo mínimo i ta konsehá asta pa eliminá e makutu básiko i introdusí un otro instrumento ku por aliviá e personanan aki. Un di e riesgonan segun e wes ta ku hustamente lo bini un skarsedat ku e areglo nobo, pasobra distribidónan por mayó i komersiantenan no ta bai kumpra produkto básiko mas, pasobra e no ta bale la pena.