KRALENDIJK – Eks politico di Saba, Will Johsnon, representá pa su abogado Michiel Bijkerk a bolbe pèrdè un kaso pa loke ta trata igualdat di penshun di behes (AOV) entre e parti hulandes i e parti Karibense di Reino. 

For di 2015 e duo, e tempu ei huntu ku entre otro Aubrey Sealy, a entamá un kaso na Korte Internashonal pidiendo Korte Internashonal pa ordená Hulanda pa igualisá AOV di BES na nivel di AOW na Hulanda. Siman pasá nos a risibí e veredikto. Korte Internashonal a husga ku e diferensia di nivel entre AOW di Hulanda y AOV di BES ta hustifiká. 

Bijkerk ta skibi ku siman pasá a duna veredikto i ku a bolbe pèrdè e kaso. “Naturalmente esaki ta un gòlpi duru. No ta kla ainda ki sorto di konsekuensia e kaso aki lo tin. Nos mester komprondé gravedat di e desishon ainda. Nos tur mester sa y komprondé ku Hulanda a defendé e desigualdat aki te den Korte Internashonal”, asina Bijkerk ta deklará. Segun Bijkerk ta bisa, por mirele asin a ku e korte a duna Hulanda rason ku su ponensio ku por distinguí entre islanan BES i e parti Europeo di Hulanda, pa loke ta trata seguridat sosial. 

Konsekuensia

Segun Bijkerk, e veredikto lo tin konsekuensia en e sentido ku Hulanda awor por defendé desigualdat i haña rason den esaki tambe.    

Bijkerk ta mustra si riba e echo ku Korte Internashonal no tabata unánime den su desishon. Un di e huesnan, Gentian Zyberi, a skirbi un opinion kontrali na e desishon di e mayoria. “E frase ku el a usa pa resumí e fayo di e mayoria ta lo siguiente: ‘Inequality has been perpetuated under the guise of fairness’. Na Papiamentu: ‘A permití pa desigualdat kontinuá bou di e preteksto ku e ta rasonabel’, asina Bijkerk ta splika. 

Unkubon

Bijkerk ta mustra tambe riba e echo ku ta bira hopi importante awor pa sostené Unkobon, ku resientemente a kuminsá un kaso nobo ku lo wòrdu hibá te Korte Europeo. “Den esaki tambe Unkobon tambe ta trese dilanti ku den un solo pais no por tin dos nivel di derecho humano. Awor ku Boneiru ta forma parti integral di Hulanda, derechonan humano y sosial mester wòrdu igualisá”, asina Bijkerk a konkluí.