KRALENDIJK – Ta konosí ku den su tempu liber rei Willem-Alexander ta bula tambe i ta sinta den kabina. Siman pasá públiko por a mira esei na yegada di e famia real na Boneiru.

E avion di gobièrnu Hulandes, un Boeing 737, ku e famia real a bula bin islanan Karibense kuné, tin komo tripulante pilotonan di KLM. Pasobra e rei ofisialmente ta piloto di KLM-737, e por bula e avion aki tambe.

Na edat hóben rei Willem-Alexander a optené su promé lisensia di piloto. Despues a sigui un entrenamente riguroso na KLM Flight Academy i te ku awor nos rei ta ku regularidat den nubianan.

I esei ta nesesario tambe: pa por bula, bo mester ta minimalmente dos biaha pa luna den kabina i ta eksistí un kantidat mínimo di oranan di buelo pa aña. Pa e mes sinta tras di e kònòpinan na kaminda pa un bishita di estado, ta un kestion di dos den un pa e rei Hulandes.

Piloto invitá

Sin embargo e rei no ta bula su so òf ku su famia  so. E ta tambe un asina yamá ‘piloto invitá‘ na KLM. Esei ta nifiká ku komo ko-piloto e ta responsabel ku regularidat pa transportá pasahero sin ku nan sa ken ta tras di stür.

Na final di 2021 un grupo di fèn di Feyenoord, ku a kaba di baha na aeropuerto di Praag, a siñalá e rei. Na kaminda nan no tabata sa mes ku ta e rei tabata den kabina.

Den kòmbersashon ku De Telegraaf e rei a yega di konta un biaha ku tin ora e hendenan ta rekonosé tòg na su bos. “E bentaha ta ku semper mi ta yama e pasaheronan bonbiní na nòmber di e kapitan i su tripulashon. E ora ei mi no tin nodi di menshoná mi propio nòmber”, el a bisa e tempu ei.

En todo kaso Willem-Alexander ta hasi hopi esfuerso pa mantené su título komo piloto. El a yega di haña entrenamentu pa e avionnan Fokker, pero na momentu ku KLM a deshasí di e marka Hulandes ei di avion, e rei mester a bai bank’i skol bèk.

Ku un dósis di rekapasitashon e rei por a sigui ku su karera komo ko-piloto den e Boeing 737. Ora e ta konta di e tempu ei, e soño di un mucha hòmber ta bolbe bini dilanti. “Tabata parsemi algu dibertido pa bula otro destinashon tambe, ku mas pasahero i distanshanan mas largu”, segun e rei ta konta den 2017.