Kralendijk – Departamento di Salubridat Públiko ta hasi un yamada na siudadanonan ku un estado di salú vulnerabel pa pasa e angua di corona si nan no hasi esei ainda.  Ta bai pa hendenan ku por ehèmpel diabétis, preshon haltu, malesa vaskular i di kurason. Si hendenan den e grupo di riesgo akí pega ku e vírùs di corona, nan ta kore un riesgo mas grandi ku nan ta haña keho serio i tin ku bai hòspital.

Na Boneiru e variante delta di e vírùs ta aktivo. Ta konosí ku hende por pega muchu mas fásil ku e variante akí. Hendenan ku un salú vulnerabel tin biaha ta pensa ku ta mihó si nan no pasa angua. Pero hustamente pa e hendenan akí ta hopi importante pa nan bakuná. Asina nan ta kore ménos riesgo ku nan ta haña keho serio si nan pega ku e vírùs. 

Pa un bon protekshon ta importante ku un persona ta kompletamente bakuná, pues a pasa dos angua. Finalmente un persona ku pasa dos angua tin ménos chèns pa den kaso di kontagio bira hopi malu i bai hòspital. Ta rekomendá hende ku un salu vulnerabel pa konsultá ku nan dòkter di kas promé ku nan pasa angua. 

Siudadanonan ku ke traha un sita pa pasa angua kontra corona, por yama e number grátis 0800 0900. Nan por pasa e angua tambe sin sita djasabra di 09:00 – 14:00 na Kompleho Deportivo Jorge Nicolaas. Na e sentro deportivo semper un dòkter ta presente pa kontestá pregunta tokante e angua di corona promé ku un hende pasa e angua.

---

Lesa tambe:

• 
  Partnernan di CAO pa Islanan BES a topa pa deliberá riba desaroyo 
• 
  Prevení Zika, Dengue i Chikungunya
• 
  Organisashonnan Karibe Hulandes ta traha huntu pa preveni violensia kontra hende muhé
• 
  Sindikalismo na Boneiru parti 47, 25 di novèmber 2024
• 
  Curoil ta hasi su mes kulpabel na komportamentu sin rèspèt, pero gobièrnu ta tolerá esei