WILLEMSTAD  –  Kòrsou ta embeyesé. Si den añanan sesenta di siglo pasá habitantenan di e isla tabata yega 67 aña di bida, awor entre 2015 i 2022 esaki a oumentá te  kasi 79 aña. Esaki Ofisina Sentral di  Statistik ta informá.

Tambe e porsentahe riba 65 aña ta bira mas grandi. Na 2011 13.6 porshento di e poblashon total tabata konsistí di e grupo di 65+. Pa 1 di yanüari 2022 esaki a krese te ku 19.8 porshento.

Pa 1di yanüai di e aña aki Kòrsou tabatin 29.930 habitante mas grandi ku 65 aña, esaki ta un riba kada 5 habitante. Un análisis di e katidat di habitantenan di edat di 65 te ku 100 aña ta mustra ku 60 porshento di e grandinan aki ta hende muhé.

Hende muhé ta bira mas bieu den e estadístika aki. Speshalmente riba 85 aña. Di e grandinan  riba 100 aña 83 porshento ta hende muhé. 

E kategoria di 0 – 14 aña for di 1992 te ku 2022 a baha di 26 porshento pa 17 porshento . Esaki ta debí ku ménos beibi a nase den e periodo aki. E kategoria di 15 – 64 aña a keda konstante den e mésun periodo. 

Desempleo

Mas i mas hende grandi mester sigui traha. E sifra kresiente di desempleo di hendenan mas grandi ku 65+ ta indiká ku mas hende ta buska un trabou, apesar ku nan a yega edat di peshun, segun CBS, ku ta usa sifranan di e instituto di salubridat Kòrsou, VIC.