WILLEMSTAD – Thierry Baudet ta na Kòrsou. Ayera nochi el a papia den Papagayo Beach Club tokante vishon di e partido pa Karibe Hulandes, manera e lider di Forum voor Democratie ta ‘twitter’.

E eskoho pa Kòrsou komo sitio pa papia di Karibe Hulandes ta remarkabel. Karibe Hulandes ta enserá solamente e islanan Boneiru, Saba i Sint Eustatius, i Den Haag ta goberná nan sentral. 

Forum voor Democratie ta bisa di ta orguyoso di e historia komun ku e islanan i ke mantené e lasonan históriko. E partido ta mira posibilidat pa kompanianan Hulandes bin invertí akinan. Nan presensia den e área Karibense, inkluso Aruba i Kòrsou, ta brinda Hulanda segun e partido akseso na merkadonan grandi den Suramerika.

Antia por bira e ‘Florida di Hulanda’, e partido ta skirbi riba su sitio wèb, kaminda no ta tolerá ningun korupshon, enrikesimentu personal i maluso di poder.

Pa  hasi invershonnan posibel e partido ke pa establesimentu liber ta faktibel pa kompanianan i siudadanonan Hulandes riba tur isla Karibense. 

Baudet ta hasi un yamada riba tur Hulandes riba e islanan i e habitantenan di Karibe Hulandes pa bai vota 15 di mart. E dia ei lo vota pa kolegionan elektoral ku riba 30 di mei lo duna nan voto pa e konstelashon di Eerste Kamer.