WILLEMSTAD – E moneda konmemorativo ku rei Willem-Alexander a imprimí djabièrnè ta un di e último monedanan konmemorativo di Kòrsou i Sint Maarten, e florin Antiano-Hulandes.

Si tur kos kana segun plan Kòrsou i Sint Maarten ta haña 1 di yanüari 2024 un moneda nobo, Florin Karibense. Mester a introdusí esei for di 2010, pero a posponé e introdukshon vários biaha e último djesdos añanan. E motibunan pa esaki tabata entre otro e situashon ekonómiko malu di último añanan i e impakto di e pandemia di COVID-19.

Legal

Banko Sentral di Kòrsou i Sint Maarten ku ta e úniko identidat ku por imprimí moneda riba e dos islanan komo forma di pago legal, ta emití e moneda konmemorativo aki, e sinku florin di plata, na honor di Willemstad. E área históriko di Willemstad ta aparesé for di 1997 riba e lista di Patrimonio Mundial di UNESCO.

Willemstad ta pertenesé na un grupo chikitu di World Heritage Cities, ku ta konsiderá komo monumento pa motibu di nan balor históriko universal  i kultural.Su barionan bieu ku nan historia signifikativo, diversifikashon kultural, e arkitektura urbanisá úniko i e mas ku 700 monumentonan kolorido. Willemstad ta representá tambe un siudat portuario úniko i históriko  den Karibe.

Moneda

Koninklijke Nederlandse Munt ta imprimí e moneda konmemorativo aki. E diseño di e moneda ta igual ku esun di e moneda Hulandes di sinku euro i pa kua rei Willem-Alexander a realisá djabièrnè e prome ehemplar.

Pasobra e moneda aki ta honra e Patrimonio Mundial importante di UNESCO na Kòrsou, a hasi un yamada públiko na diseñadó- i artistanan na Kòrsou pa diseño di tantu e moneda di euro komo e moneda di florin.

Willemstad

E diseño ganadó a resultá di ta e artista  Yu di Kòrsou Cleo Maxime de Brabander. Riba e bandi dilanti ta mustra Rei Willem -Alexander ku den fondo  e imáhen di brùg Reina Juliana na Willemstad.

E kuater streanan na e parti dilanti ariba ta símbolo di e kuater paisnan ku ta forma Reino Hulandes: Kòrsou, Aruba, Sint Maarten i Hulanda.

Riba e banda patras tin un bista di e siudat ku Punda, Otrobanda, Skalo i Pietermaai, e kuater barionan ku ta forma parti di e Patrimonio Mundial di UNESCO.

A inkorporá kuater diferente monumento importante riba e moneda: Handelskade, Snoa Mikvé Israël-Emanuel i Fort Amsterdam den Punda i tèmpel Emanuel, ku ta karakteristiká e komienso di e bario Pietermaai.

Ta suministrá e moneda, ku ta emití den e kalidat mas haltu konosí komo ‘Zilver Proof’, den un estuche ku Sertifikado di Outentisidat i ta limitá na 500 moneda.