DEN HAAG – Djaluna 24 di yuni 2024 a tuma luga, e kumbre di BES na edifisio di VNG na Den Haag, markando un momentu signifikante pa e islanan di Boneiru, St. Eustatius i Saba. E kumbre aki a konta ku presensia di representantenan di tur tres Konseho Insular pa diskutí asuntunan krusial i fortalese esfuersonan di kooperashon pa futuro.

E agènda kuminsá ku e apertura, sigui pa e ratifikashon formal di e notulonan di e reunion di Konseho Insular nan di BES di yanüari 2024. Un punto kulminante di e kumbre tabata e seshon di evaluashon di e resultadonan di e konferensia di trabou ku a tuma lugá di 4 te 6 di mart 2024, ku a duna sierto konosementu balioso i a pone e fundeshi pa inisiativanan di kooperashon konhunto pa futuro.

Un parti integral di e agènda tabata dediká na diskushonnan riba un karta konhunto pa e Minister di Finansas tokante leinan nobo di impuesto. A akordá unánimemente ku ekspertonan legal ku ta spesialisá den legislashon di impuesto lo skirbi e karta aki na nòmber di e islanan, pa asina por demostrá un posishon uní tokante asuntunan legislativo.

E diskushonnan despues tabata dirigí riba fortalese kooperashon entre Boneiru, St. Eustatius i Saba, pa keda enfatisá meta kompartí i responsabilidatnan mutuo. E diálogo aki tabata fundamental pa reforsá e strukturanan di kooperashon entre e islanan.

Un momento simbóliko durante e kumbre tabata e entrega formal di e presidensia. E presidente saliente, Sr. Glennville Schmidt di St. Eustatius, a pasa e presidensia na Sra. Elsa Peterson di Saba. E transishon aki ta suprayá e kompromiso na representashon hustu i rotashon di liderato entre e islanan, garantisando un partisipashon igual den e prosesonan di toma di desishon.

Despues di e transishon aki, sigui un seshon di mesa rondó kaminda partisipante nan a hiba diskushonnan riba asuntunan urgente ku ta afektá e islanan BES. E kumbre a kulmina ku un sintimentu di logro i optimismo pa e futuro di kooperashon BES. E desishonnan stratégiko i diálogo konstruktivo durante e kumbre ta sperá di habri kaminda pa un kooperashon mas fuerte entre Boneiru, St. Eustatius i Saba.