WINDWARDSIDE, SABA- Dia 26 di juni, Stichting Pensioenfonds Caribisch Nederland (‘PCN’) a tene un selebrashon  pa selebrá ku a yega na e punto mas haltu di e hotèl ku tabata konosí komo Scout’s Place.

E hotèl a wòrdu kumprá algun tempu pasá pa e fondo di penshun komo un proyekto di inversión i desaroyo, despues di kua un trayekto di renovashon i ekspanshon intensivo a start. Den presensia di representante di PCN i e Kolegio Ehekutivo di gobièrnu di Saba, a presentá tambe e nobo nòmber di e hotel: Scenery Hotel, referiendo na Mount Scenery, e seru mas haltu di Reino Hulandes.

Direktor Walter Blijleven di Participatiemaatschappij Caribisch Nederland (PMCN) a duna un resúmen di e desaroyonan di e último 16 luna desde ku e konstrukshon a kuminsá. Blijleven a duna elogio na e kontratista QBC pa e kalidat i e spit ku kua e trabou ta keda ehekutá. Blijleven a elogiá tambe e mentalidat di e trahadónane lokal ku ta kontribuí ku orguyo na un proyekto asina importante pa e isla.

Faktornan ESG

Presidente di PCN Harald Linkels a enfatisá e importansia di bon inversiónnan na Boneiru, St. Eustatius i Saba. Linkels a splika ku pa e selekshon di proyektonan ku ta wòrdu finansiá pa PCN e faktornan ESG (Environment, Social i Governance) ta birando mas i mas importante. “Naturalmente, nos ke logra primeramente un bon rendimento riba nos invershonnan,  pero na mes momentu nos ta preferá pa invertí den kosnan ku tin un impakto positivo riba nos islanan, ku ta proyektonan responsabel di un punto di bista di naturalesa i medioambiente, ku tin un impakto sosial riba e habitantenan i kaminda por papia di bon maneho.”