KRALENDIJK- Tourism Corporation Bonaire (TCB) i e tim di sòftbòl New Angels ta bai organisá e promé Bario Festival ku lo tuma lugá den Nikiboko. E evento ta tuma lugá na Parke Lalan Clarenda riba djasabra 6 di yüli 2024  den un tremendo ambiente di ‘Vakantie Vibe’ for di 5 ‘or di atardi te 11 ‘or di anochi.

E programa ta kargá ku músika i tin stènt ku ta bende kuminda lokal.  E agrupashonnan musikal Grupo NikiMix i Farley Entertainment ta presente pa animá e anochi akí.  Pa duna e Bario Festival un toke mas spesial tin presentashon tambe di ACE CLUB,  Arte di Palabra, un show di baile multikultural, vários homenahe, diferente DJ  i hopi mas. Entrada ta kompletamente grátis.

TCB i tim di sòftbòl New Angels ta ekstendé un kordial invitashon na pueblo di Boneiru i tambe na tur nos bishitantenan pa bin pasa un ratu ameno huntu ku nos riba djasabra 6 di yüli  den e promé  edishon estilo ‘Vakansi Vibe’ di Bario Festival ku ta bai tuma lugá den e bario di Nikiboko.