KRALENDIJK – Mientras ku riba 1 di yüli Boneiru ta rekordá abolishon di sklabitut na 1863, ta reina desunion tokante e libertat aktual di e isla. No ta tur hende riba e isla tin e sentimentu di  ta bibá awor riba un isla liber. Felipe Melaan, un persona ku krítika skèrpi riba e influensia Hulandes, ta pretendé ku Boneiru ta pèrdè su identidat i libertat pa motibu di influensianan Hulandes. Segun Melaan Boneiru a “daña” pa motibu di intervenshon Hulandes i e isla ta pèrdè mas i mas su identidat i su libertat.

Melaan a biba 22 aña na Hulanda. Sinembargo e tin basta tempu bibá na Boneiru atrobe. Na e momentunan aki e ta biba den e bario di Nort’i Saliña. Melaan ta un Boneriano krítiko i skèrpi ku ta duda den e libertat riba su isla. Segun e ta hopi dudoso si Boneiru di bèrdat ta liber di sklabitut. Pasobra den su kurá tin un bòrchi grandi ku tekstonan manera: ‘1863, a abolí sklabitut’, ‘Liber di Hulanda’, ‘Yuda awor òf (re)kolonisá’  i ‘Hopi mas tiki makamba’.

24 aña pasá Melaan a regresá Boneiru. For di e tempu ei el a mira Boneiru kambia drástikamente. “Naturalmente Boneiru a kambia hopi. Ainda e ta kambiando ekstremadamente”, Melaan ta bisa skèrpi. “Esei mi ta haña un tiki dimas, bon mirá …… Mi no ta haña bon.”

Rabia tokante desishonnan Hulandes  

Melaan ta sinti su mes oprimí tambe pa e poder di desishon Hulandes riba e isla. “Mi tin problema ku Hulandesnan ku ta tuma desishonnan,” e ta splika. “Mi tin problema ku esun ku ta disidí kon nos tin ku biba.”

Segun Melaan e influensia Hulandes ta dañino pa e isla. E ta indiká ku e poblashon lokal mester adaptá na e sistema Hulandes di biba, loke segun e no ta kuadra ku Boneiru. “Mi ta haña ku e reglanan ku e Hulandesnan ta bini akinan kuné, no ta kuadra ku e isla aki,” segun Melaan. “I nan manera di proseder tambe.”

Un di e frustrashonnan mas grandi di Melaan ta e privatisashon di  playanan i e akseso limitá na kosta. “Mi no por ni kana keiru dushi kantu di kosta. A konstruí kas- i resortnan. E playanan ta privá. Kon bo por tin playanan privá?” e ta bisa rabiá.

Korupshon

Banda  di e metementu di Hulanda Melaan ta kritiká e korupshon tambe dentro di gobièrnu lokal. “Mi ta kontra tur hende ku ta korupto,” e ta bisa. “Por ehèmpel, e rotonde aki na Kaya Amsterdam. E proyekto a faya kompletamente. Pero unda e sèn a keda?

Melaan tin un bòrchi den su kurá kaminda ta pará: ‘Na 1863 a abolí sklabitut’. Segun e krítiko ta keda dudoso si di bèrdat esaki a sosodé kompletamente. “Nos ta biba ainda den un kolonia”, segun Melaan. Ku su bòrchi den kurá e ta keda pidi atenshon pa e situashon na Boneiru. “Mi opinion ta ku ainda e Hulandesnan ta sigui oprimí nos. Asina simpel e ta.”

Haña libertat bèk

Segun Melaan Boneiru mester lucha pa mas outonomia i kontrol di Nashonnan Uní (VN). “Mi tin deseo pa Boneiru bini riba e lista di Nashonnan Uní. Riba e lista aki tin islanan ku no tin propio gobernashon. Mi tin deseo pa VN bai kontrolá kiko Hulanda ta hasiendo na Boneiru,” e ta sugerí.

Finalmente Melaan ta bisa: “Boneiru mester bai sigui su propio rumbo. Mi no ta sinta warda riba e reglanan ku Hulanda ke bin implementá akinan. Serka mi libertat ta konta. E mundu ta di tur hende. Bo tin mag di bin biba akinan. Pero mi tin problema ku esun ku ta disidí kon nos tin ku biba.”