KRALENDIJK- Fundashon Mariadal ta trahando riba varios inovashon na botika, ku mester mehorá e eksperiensia di kliente. Asina e fundashon a duna di konosí siman pasá durante un conferensia di prensa tokante e situashon aktual di distribuí remedi.

Un di e inovashon nan ta ku klientenan lo haña un mensahe di sms òf e-mail ora nan remedi ta kla. Den e botika, kliente por usa e aparato di outo-servisio pa primí e opshon “Buska remedi” (lèter: C). Di e manera aki, kliente ta haña su remedi mas lihá.

E sistema ta den uso pa algun luna awor i, segun Mariadal ta bisa, esaki ta trese hopi fasilidat pa e kliente.

Servisio di repitishon 

Tambe tin ya mas ku 600 kliente ku ta registrá den e asina yamá Herhaalservice (HHS), òf servisio di repitisohon. Klientenan ku ta uza remedi di forma duradero, por registrá nan mes na botika. Despues di esaki, e kliente no tin ku pidi resèpt mas. Botika mes ta kalkulá ora e remedi di e kliente ta kabando, ta pidi remedi nobo i ta pidi e resèpt nesesario na e dòkter di cas.

Resientemente, e botika a organisá un seshon di informashon pa e klínikanan di dòkter di kas pa splika e servisio di repití remedi na nan tambe.