KRALENDIJK – Sambuyadónan atento  a señalá djaluna un tribon martin na e sitio di buseo Red Slave. No sa mira e tribon, ku tin un grandura di masomenos 2,5 meter (8 pia), masha. Pa sambuyadó Alev Ozten Low e tabata un dia úniko ku un eksperensia ku e lo no lubidá lihé. 

Ta deskubrí ketu bai kriaturanan bunita den e awanan di Boneiru. Asina a sosodé ku Nicolette Love, un boluntario di Stinapa, a topa luna pasá un bayena di Bryde. E siman aki fotógrafo di bou di awa Alev Ozten Low tabata e persona felis ku a topa kara kara ku un kriatura di bou di awa impreshonante.  A mira un bayena martin na un profundidat di mas o ménos 23 meter (77 pia) na Red Slave. For di e awa blou e ehemplar a landa bai e ref, pa despues landa bai direkshon di suit. Diferente sambuyadó a mira e tribon martin pasa bai.

Kasualidat 

Alev Ozten Low i su esposo ta sambuyadónan ferviente. Nan a saka hopi pòtrèt bunita i video kaba di hopi kriaturanan di bou di laman rònt Boneiru. E tribon martin djaluna tabata un bunita sospresa pa nan. “ It made my day. Òf bon mira it made my week”, Ozten Low ku tabata hopi felis a laga redakshon di Bonaire.Nu sa. “Mi tabata sambuyando ku mi kasá. Nos ta saka pòtrèt bou di awa i ta buska kriaturanan spesial entre e koral. Tabata hopi kasualidat ku nos tabata wak direkshon di e laman blou i a mira e ehemplar grandi landa bini riba nos. Tabata opvio tambe mesora e loke nos a mira. Bo ta rekonosé un tribon martin fásil. Mi no a pensami niun momento so i a primi mésora e kònòpi ‘record’ riba mi kamera.

Tribon martin grandi 

Tin diferente tipo di Tribon martin. Ozten Low i su esposo a bini den kontakto ku e ‘Sphyma mokarran’ òf ku otro palabra e tribon martin grandi. Ta e tipo di tribon martin mas grandi ku ta eksistí. E largura máksimo ta mas o ménos seis meter. Ta rekonosé e tribon fásil , pasobra e tin un kabes hanchu ku un tipo di martin hanchu i règt. Na e parti pafó di e martin aki tin su wowonan. 

E tribon martin ta un espesie ku peliger di ekstinshon. Sinembargo ta piska hopi ehemplar ainda for di oséano. Den paisnan manera Italia, Brasil, Uruguay, Taiwan, China, Portugal òf Spaña ta pone karni di tribon riba menú. Na China nan ta interesá tambe den e kaikainan. Akinan nan ta traha sòpi di kaikai di tribon ku nan. Segun kalkulashon ta mata 100 mion tribon pa aña. Indonesia, India, Spaña, Mèksiko i Estados Unido ta e paisnan ku ta yag mas tantu riba tribon.

Nada di miedu

Inhustamente ta mira tribonnan hopi biaha komo un bestia peligroso. Ku su largura i djentenan impreshonante, un tribon por parse di bèrdat espektakular. Ozten Low i su esposo no tabatin miedu:”E tribon a landa bini for di awa blou. E bista tabata bon. Finalmente e tribon a aserká nos riba un distansia di mas o ménos tres meter. Aki el a hasi un bògt skèrpi i a landa lihé bai. Si mi tabatin miedu? Nò, niun momento so. Nos no tabata yag riba lionfish tampoko. Pa e motibu ei mi no a mira mi mes tampoko komo un víktima pa e tribon. Bon mirá mi tabata sintimi felis ku mi por a mir’é”, segun Ozten Low.

E tribon a hasi un bogt na banda drechi i a sigui landa. Un biaha mas Ozten Low a tira un bista riba e rabu. Despues e tribon a sigui direkshon di suit di e isla.