THE BOTTOM – Riba 11 i 12 di aprel 2024, Inspekshon di enseñansa a kondusí un inspekshon di kalidat na Sacred Heart School, despues di señalnan ku kos lo no tabata kana bon na e skol. E konklushon di investigashon, segun Inspekshon ta bisa den su rapòrt ta prekupante: kalidat di enseñansa na skol a keda klasifiká komo insufisiente pa loke ta trata vários aspekto. 

Asina Inspekshon ta bisa ku tin un falta di vishon i meta, falta di un kultura di kalidat, i kuido defisiente di studiante. Tampoko e skol no ta duna sufisiente aporte efisiente na studiante, ku ta kondusí na atrasonan den siñamentu. Ademas, tin falta di lès di Hulandes i Ingles, ku ta resultá den defisiensia di idioma.

Siguridat na skol tampoko no ta sufisiente; Segun e rapòrt polítika di siguridat mester wòrdu aktualisá, i un kordinadó i punto di kontakto pa asuntu di tentamentu (bullying) tin ku wòrdu nombrá. Tempu di instrukshon no ta sufisiente i e tempu no ta wòrdu usá efisientemente. Banda di tur esakinan, e manera ku ta manehó klas no ta konsistente.

Ademas, e guía di skol no ta kumplí ku rekesitonan legal, i e skol mester sigi periódonan di fakansi establesé.

Mehorashon

Segun Inspekshon, e skol tin mester traha urgentemente riba mehorashon di kalidat di enseñansa, un subida den e tempu di instrukshon, garantisá un ambiente seif, establesé un vishon kla pa un enseñanza di kalidat. 

Inspekshon ta hasi un apleashon riba liderato di skol, direktiva i dosente pa traha huntu pa yega na e mehorashon nesesario.