KRALENDIJK- Ounke ku riba Medianan Sosial por lesa masha hopi kos tokante diferente empleado den tòp di e departamento di Finansas ku lo a bandoná e organisashon, esaki no ta nada nobo. 

Ya pa años tin sierto tenshon interno i retiru di empleado ta tumando lugá i e tendensia aki pa motibu ei no wòrdu atrubuí sin mas na e Kolegio Ehekutivo aktual, òf mas spesífiko, diputado di finansa Clark Abraham. 

E kantidat grandi di empleado ku a tuma nan retiro sí por tin di haber, entre otro, ku e kultura di miedu ku a wordu identifiká den e raportahe ku e Inspektorado di Medio Ambiente & Transporte (ILT) a presentá na yüni 2023, tokante sakamentu di pèrmit i mantenshon (VTH) na Entidat Públiko Boneiru. 

Tin indikashonnan fuerte ku e konklushonnan di ILT no solamente ta konta pa direktorado di R & O, pero tambe por ta aplikabel den otro partinan di OLB, inkluyendo e departamento di Finansas. “Den e último sinku añanan aki nos no a risibí e atenshon nesesario, prinsipalmente tokante e sosten pa empleado na nos departamento. Dia 8 di yüni 2020 e hefe di Finansiën a wòrdu kitá di forma ad hoc. Un aña despues a sigui …., despues …… siguí pa ….. i awor ……,” ta algun di e komentarionan ku por lesa den un asina yamá exit interview di un empleado femenina di rangu basta haltu, den kual ABC Online Media a logra tira un bista. 

E empleado envolví ta pinta un imágen no muchu alentador di e situashon, ku ta di un fecha bastante mas promé ku e kambio den Kolegio Ehektivo na òktober 2023. “For di aña 2020 no tin ningun kambio supstansial ku a wòrdu implementá na benefisio di nos komo empealdo. Tin poko òf ningun atenshon pa e desaroyo i sosten di empleado. Mi palabrashon pa loke mi mester logra den mi trabou ta basá riba aña 2020.” 

Liderazgo

E empleado en kestion tampoko no tin masha komentario positivo tokante e lideranan ku resientemente a bandoná e servisio. Riba e pregunta kon e empleado envolví lo deskribí e ambiente di trabou, esaki ta kontestá: “E hefe tabata komportá su mes manera un isla riba su mes. E no tabatin ningun konekshon ku e team.” 

Riba otro pregunta si e empleado tabata sinti ku su kontribushon tabata wòrdu balorá, esaki a bisa ku esei no tabata e kaso ètòl. Ademas e empleado a sigui bisa: “Na FIN (departamento di Finansas, red) nos falta liderazgo, rumbo i kouching. Nos a risibí na momento dado e tarea pa nos mes pone nos metanan na trabou. Desde ku e hefe nobo ta aki, nunka nos no a sinta huntu. Solamente durante reunion ta papia di trabou. E ni sa ken e persona ku ta remplasé, ora ku e mes no tei, ta”. 

Sondeo

Diputado Abraham den un reakshon a bisa tambe ku e tambe ta mira e kantidat di hende ku ta bandoná e departamentu komo algu preokupante. “Naturalmente esaki tin nos atenshon. Pero mi ta refutá kategórikamente ku ta algu nobo, òf algu ku a kuminsá for di dia e Kolegio aki a sinta. 

Abraham ta indiká ku Kolegio Ehektuvo awor ke hasi un sondeo pa haña mihó bista dikon tantu empleado, spesífikamente tambe riba nivel haltu, ta bandonando e servisio. 

“Nos por kore buksa un persona nobo den purá, pero esaki no ta bai solushoná e problema. Nos ta preferá na e momentu aki pa kontratá un persona riba base interino, i hasi e sondeo pa sa kiko ta pasando i kon nos por mehorá e situashon. Ora nos sa esei, nos por buska un hefe nobo di forma mas trankilo.”, asina Abraham a konkluí.