KRALENDIJK – Konstrukshon di e parke di hunga na Kaya Mamparia Kutu ta yegando su finalisashon. E trabounan ta den e fase final, i e organisadónan di Jantje Beton ta spera  ku e parke di hunga por ta kla den e di dos siman di dezèmber, ku un posibilidat ku por bira komienso di yanüari.

E kurá di hunga den e bario Nieuw Amsterdam  ta un di e hopi parkenan di hunga ku Jantje Beton ke realisá na Boneiru.  E lugá di hunga nobo ta destiná pa muchanan di e bario Nieuw Amsterdam, ku pa basta tempu kaba tin nesesidat di un lugá pa nan por rekreá. Na entrada di e parke di hunga ta bini un bòrchi ku regla, ku entre otro instrukshonnan pa limitá molèster di zonido. A enkargá Indebon ku e responsabilidat di mantenshon i supervishon di e parke di hunga.

Pa garantisá siguridat di e muchanan, a pone un kurá rondó di e tereno. Esaki mester prevení ku muchanan ta kore subi kaya inesperá òf ku kachonan ta subi e tereno. Tambe ta konsiderá pa sera e porta di kurá anochi, pa tene gruponan no deseá di hóben pafó di e tereno. E maneho di yabi den e kaso ei lo ta na enkargo di Fundashon Cas Boneriano.