KRALENDIJK- E marshe i Expo di Justitiele Instellingen Caribisch Nederland (JICN) ku ta tuma luga tur aña a tuma luga djasabra a logra atraé bastante bishitante ku a bin pasa wak si tabata tin algu di nan gustu. 

E evento anual, meskos ku otro aña a ofresé un variedat di produkto trahá na man, manera muebel, pintura, hoya i mata, tur fabriká pa detenido. E marshe ta forma parte di e proyekto “Ban pa Kambio”, ku ta ta yuda detenido atraves di trajekto di siña i traha i MBO- pa yega bek den komunidat ku éksito.

E aña aki tambe e prison di Kòrsou a partisipá, loke a trese un adishon úniko na totalidat di e oferta di kos pa kumpra. 

Despedida

E evento e aña aki a marka despedida di direktor Wibo de Vries i kordinadó Karel Martis, ku for di 2013 a yuda grandemente na e éksito di e evento. A yama un danki grandi na e dos persona pa nan esfuerso pa yuda hasi e evento e lokual ku e ta awendia.