KRALENDIJK –  Den nos rúbrika ‘Bèk na Boneiru’ nos ta sigui personanan Boneriano ku a lanta na Boneiru, a traha òf studia den eksterior, pero despues ta bini bèk atrobe. Den e di djesdos seri nos a papia ku Chelsey Samjah Domacasse. Despues di su biahenan den eksterior el a bira un kòki privá eksitoso na Boneiru. Abo tin, òf abo konosé un hende tambe ku un storia úniko? Duna redakshon un tep. 

Chelsey Samjah Domacasse ta un nòmber ku ta zona konosí pa hopi hende na Boneiru i pafó di Boneiru. Nasé na Kòrsou, el a muda na edat di tres aña pa Boneiru, kaminda su famia tabatin lasonan fuerte kaba. “Mi tata ta di Boneiru i mi mama ta di Kòrsou, pero e ta mitar Boneriano, mitar yu di Kòrsou,” Chelsey ta konta. Apesar di su desendensia miksto, e ta konsiderá su mes komo un Boneriano di bèrdat.

E storia di Domacasse tin lasonanku e storia riku di su famia riba e isla. Su welo tabatin un restorant renombrá yamá Den Laman, ku tabata situá na Hato. “E tabata un bunita restorant ku un akuario grandi ku krefnan fresku ku bo mes por a skohe,” e ta kòrda. Lástimamente e restorant no ta  eksistí mas, pero e rekuerdonan di e tempu ei ta keda bibu.

Hubentut Deportivo 

Domacasse su hubentut tabata yen di aktividatnan deportivo. Su tata, Robbie Domacasse, i su tio ta ámbos coach di tènis, i Domacasse a lanta ku tènis. “Mi mayornan tabata ke pa mi a bira un hungadó di tènis profeshonal, pero esei no a logra,” e ta atmití. Banda di tènis e tabata aktivo tambe den windsurf, futbòl, balèt i karate. “Semper mi tabata hasiendo di tur un poko” e ta hari. E pashon aki pa deskubrí tur kos a kuminsá na edat hóben kaba. Ainda Domacasse tin e pashon pa hasi hopi kos. Mas tokante esei ta sigui.

Ounke Domacasse a lanta den e mundu di deporte i na promé instante a skohe pa bai studia atministrashon empresarial na Amsterdam, el a haña finalmente su pashon den mundu kulinario. “Mi no kier a drenta nunka den negoshi di restorant manera mi mama, esei a parsemi muchu pisá,” e ta konta.  Sinembargo mi a disidí di sigui un kurso kulinario na Miami, un siudat ku a risibi’é ku brasa habrí. “Mi tabata gusta Miami. E wer, e kuminda i e kultura tabata fantástiko,” e ta bisa entusiasmá. P’esei Domacasse a sali despues di dos aña di estudio na Hulanda pa Miami.

Aventura Merikano 

Domacasse su tempu na Miami sinembargo no tabata sin desafio. E pandemia a obligu’é hopi lihé pa regresá Boneiru, kaminda el a lanta su propio empresa, Intimate Dining. “Nunka mi no kier a habri un restorant tradishonal. Intimate Dining ta trata di kumindanan chikitu i personal kaminda bo por hinka tur bo pashon,” e ta splika. Su spesialidat? Dumplings. “Na Miami mi tabata traha den restorantnan Asiátiko i mi tabata traha sentenares di dumplings pa dia,” e ta bisa ku orguyo. Na Boneiru Domacasse ta kushiná pa gruponan selektá. E ta hinka hopi tempu i energia den esaki. Su platonan ta spesialisá i bo no ta haña nan tur kaminda riba e isla.

E kambio di un Miami vibrante pa un Boneiru trankil tabata un kambio grandi pa Domacasse. “Boneiru ta bunita. Mi stima e isla. Mi ta hañ’é hopi ketu i trankil si mi kompar’é ku Miami. E ta mi kas. Mayoria di mi amigunan ta biba aki. Tin desbentaha tambe. Por ehèmpel tin posibilidatnan limitá pa hasi i kumpra algu,” e ta remarká. Tòg el a haña su lugá riba e isla. No solamente kulinario, pero awendia tambe den konstrukshon. Domacasse a kuminsá traha den sektor di konstrukshon pa su tio. Sinembargo su amor pa kushiná ta keda fuerte. “Kushina lo ta semper mi enfoke,” e ta enfatisá.

No tin miedu pa faya 

Domacasse ta enkurashá hóbennan di Boneiru pa no tene miedu pa sigui nan soñonan. “No tene miedu pa faya. Riska hasi loke bo kurason ta bisabo,” e ta konsehá. Ku su mama komo su simpatisante mas grandi, Domacasse a siña ku ta importante pa sigui bo pashon, asta si e kaminda ta insigur.

E storia di Domacasse ta unu di kambio i adaptashon kontinuamente. E no tin miedu pa konfrontá retonan nobo i ta keda sigui su soñonan, sea ta den kushina òf den konstrukshon. “Mi ta pensa grandi i mi ta kere ku tur kos ta posibel. Na Boneiru, pero podisé tambe den resto di mundu,” e ta bisa na final.