Akto di vengansa i di maka fe. Ta e úniko forma ku nos por kalifiká e posishon ku gabinete Schoof a tuma pa loke ta e maneho ku e islanan den Caribe huntu ku Ulanda a bin ta hiba for di 2018 pa por a yega na desishonnan pa kombatí pobresa riba nos islanan ku for di 2010 a skohe pa ta parti integral di Ulanda. 

E akseptashon di e tres islanan komo parti di e struktura estatal di Ulanda a keda formalisá dor di instituí e tres islanan komo Entidat Públiko den e struktura di akuerdo ku artikulo 134 di e konstitushon ulandes i pa reflehá ku e no ta un intergrashon total di akuerdo ku leinan internashonal ulanda a agregá un artíkulo 132a den e konstitushon ku ta habri e posibilidat pa e diferenshá, esta pa no deklará tur lei i regla ku ta konta pa Ulanda Oropeo aplikabel pa Ulanda Caribense. Sindikalismo semper a akseptá i respetá e prinsipio di diferenshá, pero hamas a i lo akseptá diskriminashon pa kua motibu ku esaki por ta. Komo tal sindikalismo ta respetá artikulo 1 di nos konstitushon. 

Ku e akseptashon aki Ulanda a akseptá tambe responsabilidat kual responsabilidat ta ankrá entre otro den e lei mas haltu di U;landa, ku ta e konstitushon. I aki sindikalismo ta bolbe rekordá nos gobièrnonan na Kralendijk i Den Haag i tambe Konseho Insular i Staten General, esta Eerste i Tweede Kamer riba artikulo 20 di nos konstitushon ku ta bisa:

1. Seguridat di eksistensia di pueblo i repartishon di prosperidat ta tema di preokupashon di gobièrnu.

2. Lei ta stipulá reglanan ken por apelá riba seguridat sosial.

3. Ulandesnan den e pais aki, ku no por sòru pa nan propio eksistensia tin un derecho reglá pa lei riba ónderstant for di kaha di gobièrnu.

E artikulo aki ta e fundeshi i base di e lucha sindikal, pero tambe di UNKOBON I partnernan den Dálogo Sentral pa hustisia sosial den nos komunidat. Ta ku e arma aki den nos man nos a subi kaya huntu ku pueblo i a logra ku na 2023 a oumentá ònderstant, penshun di behes i ku a stipulá un sueldo minimo husto pa esnan ku ta traha. Ta ku e fundeshi di e artikulo aki komishon Thodé a skirbi su rapòrt “un eksistensia digno” . Ta e mesun prinsipio aki a pone ku Kolegio di Derechonan Humano i Ombudsman a sostené inkondishonalmente ku mester a kibra e kadena di pobresa. I sabiendo ku ainda no a stipulá definitivamente un minimo sosial pa nos pueblo; sabiendo ku ainda no a yega na e nivel di e sueldo minimo manera mester ta i komo tal a sostené e situashon ku suspsidionan temporal te ora yega na un solushon struktural. I awor nos a skucha nos sekretario di estado nobo deklará ku un kara seku, ku pa 2025 pa motibu ku Tweede Kamer a wanta plan di belasten pa 2025, e pueblo vulnerabel, esta e kobradó di ònderstant, e penshonado, e kobradó di sueldo minimo lo bai atras den nan entrada pasobra ta kita e supsidionan i kontra tur palabrashon ta bai kobra e kobradó di sueldo minimo belasten tambe, E posishon aki sindikalismo no por kalifiké otro komo uno di vengansa I ku lo heridá nos pueblonan di e tres islanan ku ya kaba ta vulnerabel pa kosto di bida I kosto di hasi negoshi haltu i ku un ekonomia ku ta mustrando den direkshon di a drenta den reseso. Nos ta spera ku nos sekretario di estado ku tambe ta karga den su bandera seguridat di eksistensia lo sabi na tempu di defendé e prinsipio aki den gabinete Schoof i krea e espasio pa no kibra loke ku hopi esfuerso nos a konstruí pa a krea un mihó kalidat di bida pa nos hendenan mas vulnerable den nos komunidat I ku nos a honra e prinsipio ku trabou mester paga ku un sueldo minimo rasonabel ku a oumentá e forsa di kompra na bienestar di nos ekonomia.