DEN HAAG – Pronto habitantenan di Boneiru, Sint-Eustatius i Saba mester haña akseso mas fásil na servisionan di gobièrnu mediante un ‘sistema nobo di un solo lokèt’. Den e karta di kamer di 6 di dezèmber e gabinete ta anunsia plannan pa hasi e servisio mas efisiente i mas aksesibel. E intenshon di e sistema aki ta pa sostené habitantenan riba islanan BES mihó na momento di pidi yudansa pa entrada, areglonan sosial i otro servisionan.

Introdukshon di un lokèt sentral ta bini di rekomendashonnan di e Komishon Mínimo Sosial Hulanda Karibense. E komishon ta apuntá ku hopi biaha habitantenan ta haña nan konfrontá ku servisionan di gobièrnu kompliká i plamá aki aya. E meta di e sistema di un solo lokèt ta pa duna habitante akseso via un punto di kontakto pa tur ayudo ku ta disponibel, sin ku ta manda nan di kashi pa muraya. E lokèt aki no nesesariamente mester ta físiko; ta trahando riba un kombinashon di servisio físiko, sosten digital i mihó koperashon bou di e instanshanan.

Ministerio di Asuntunan di Interior i Relashonnan di Reino (BZK) ta tuma e direkshon di e programa Servisio/Funshon di lokèt di gobièrnu i Digitalisashon Hulanda Karibense. E programanan aki mester pèrkurá ku ta yuda personanan, ku tindifikultat ku regla asuntunan di gobièrnu,mas lihé i mas mihó. Drechando e infrastruktura digital i hasi e prosesonan mas efisiente, servisionan di gobièrnu por konektá mihó na e nesesidatnan di e habitantenan.

Tambe ta invertí mediante e programa  Trabou na Ehekushon (WaU) na e forsa di ehekushon riba e islanan. Esaki ta nifiká ku ta forma ámtenarnan mihó, ta hasi fuentenan di konosementu mas aksesibel i ku ta bini palabrashon- i  instrukshonnan di trabou bon kla. E enfoke ta riba ofresé ayudo rápido, efektivo i un referensia fleksibel entre e diferente servisionan.

Digitalisashon 

Digitalisashon ta hunga un ròl krusial den mehoramentu di dunamentu di servisio. E gabinete ta traha – manera konosí – na introdukshon di e Burgerservicenummer (BSN) na Hulanda Karibense, di moda ku por kompartí datonan mas fásil entre e instansianan. Tambe ta bini un sistema di akseso sigur pa servisionan onlain via DigiD pa siudadanonan i identifikashon pa empresanan. Esaki mester hasi posibel pa entregá petishonnan digital, di moda ku siudadanonan mester bai muchu ménos bia lokètnan físiko.

Introdukshon di registrashonnan digital básiko, manera Registrashon básiko di Adrès- i Edifisionan (BAG CN), mester mehorá e konfiabilidat di datonan. Asina e servisionan di gobièrnu por tene kuenta mihó ku e situashon personal di siudadanonan i ta redusí burokrasia inesesario. Awor ainda habitantenan mester trese datonan ku ta konosí kaba serka otro instansianan, tin biaha kontra pago pa ekstraktonan. Ku e sistemanan nobo ta pone e proseso funshoná na un manera efisiente.

E gabinete ta rekonosé ku te awor e falta di datonan konfiabel tabata un opstákulo pa areglonan efektivo ku ta dependé di entrada. Mediante digitalisashon por disidí mihó ken tin mas nesesidat di ayudo. Esaki mester kondusí na medidanan mas dirigí i un repartishon efisiente di medionan.