KRALENDIJK- Inspekshon di Enseñansa a konsehá Entidat Públiko Boneiru pa no prolongá pèrmit di eksplotashon di e akohida pa mucha ‘Krèsh Chikitin Bin Bin’. Esaki ta vense dia 18 di desèmber 2024. 

Entidat Públiko Boneiru a disidí sinembargo pa prolongá e pèrmit di eksplotashon temporalmente te 1 di febrüari 2025. Di e manera akí e mayornan ta haña oportunidat pa buska un lugá di akohida alternativo pa nan yu(nan). A pone doño di e pèrmit di eksplotashon pa akohida pa mucha na altura di e intenshon akí. 

Inspekshon di Enseñansa a konsehá pa no prolongá e pèrmit pa motibu di fayonan duradero den e kondishonnan di kalidat, siguridat i salubridat pa mucha na e akohida pa mucha. No opstante e echo ku repetidamente a supliká esaki, e akohida pa mucha no a implementa sufisiente mehorashon. 

Kalidat i siguridat

Entidat Públiko Boneiru ta aksentuá importansia di kalidat i siguridat kaminda ta ofresé akohida pa mucha i a tuma medida pa sostené e mayornan. Por ehèmpel e ‘Front Office’ di Akohida pa Mucha na Direktorado di Komunidat i Kuido lo ofresé yudansa na e mayornan pa haña un lugá di akohida nobo. 

Tur ubikashon di akohida pa mucha ku un pèrmit di eksplotashon ku ta keda prolongá, ta risibí den luna di yanüari 2025 un karta tokante e prolongashon di nan pèrmit, a ménos ku a hasi otro palabrashon tokante esaki ku nan. E areglo akí ta bálido te na momentu ku e Lei di Akohida pa Mucha BES drenta na vigor.