KRALENDIJK – E ‘Tijdelijke subsidieregeling loonkosten en inkomensverlies CN’ (Areglo di supsidio temporal di gastu di suèldu i pèrdida di entrada Hulanda Karibense) i e ‘Regeling subsidie financiering vaste lasten getroffen ondernemingen Covid-19 BES’ (Areglo di supsidio finansiamentu di gastu fiho di empresa afektá Covid-19 BES), ta kaba e luna aki. E gabinete demishonario no ta mira un motibu pa desviá di e desishon pa Hulanda Oropeo, kaminda e areglonan di sosten di corona entretantu a para. Na total a paga un 98 mion dòler na Boneiru, Saba i Sint Eustatius via e dos areglonan aki. Ehekushon di esaki ta kai bou di e unidat SZW di RCN.

Areglo di Emergensia SZW

E asina yamá ‘Areglo di Emergensia SZW’ tabata sostené dunadó di trabou pa asina nan por a tene empleado, ku nan no por a duna trabou durante e krísis, den servisio tòg. E kompensashon aki tabata bini di e Ministerio di Asuntunan Sosial i Empleo. Segun e último listanan 699 dunadó di trabou a hasi uso di e areglo pa un total di 3535 empleado. Banda di esaki tabata suplementá e entradanan di 1079 empresario independiente i 554 eks empleado (ku no por a tene nan trabou) a haña un kompensashon via e Areglo di Emergensia. Ta trata di 4514 persona na Boneiru, 300 na Saba i 385 an Sint Eustatius. E suma final eksakto ainda no ta konosí – paso tin algun kaso ku ta den tratamentu ainda – pero ta trata di un total di mas o ménos 54 mion dòler. E Areglo di Emergensia SZW a terminá riba 13 di òktober 2021, eksaktamente 19 luna despues di e komienso. No ta posibel mas pa entregá un petishon.

Kompensashon EZK 

E ‘Kompensashon EZK’ ta un supsidio for di Ministerio di Asuntunan Ekonómiko i Klima pa yuda empresario pa paga nan gastunan fiho durante di e krísis. E kompensashon ta konsistí di seis areglo ku ta sigui otro. A base di e último listanan den e promé areglo 901 empresario a hasi uso di e areglo, den e di dos 563, den e di tres 457, den e di kuater 419 i den e di sinku 453. Pa e di seis areglo te ku awor a otorgá 290 pago. Te ku 31 di òktober por entregá un petishon ainda. E suma total final ta parse di sali alrededor di 44 mion dòler.

Den e promé kuartal di 2022 un kòntròl adishonal lo tuma lugá. Kompania ku a saka den e sondeo, mester motivá e informashon ku nan a duna riba nan formulario di petishon ku dokumentashon mas aleu.