DEN HAAG- Segun sekretario di Estado, Raymond Knops, ta bira tempu pa e islanan Boneiru, St. Eustatius i Saba bai traha seriamente riba e problemátika di kabritu ku ta kana lòs den naturalesa.

“E kabritunan ta kome tur kòs i ta laga solamente mata ku supiña para”, asina Knops a laga sa. No ta promé biaha ku Knops ta pida atenshon pa esaki. Durante un bishita na St. Eustatius, e mandatario a asta rabia, pasobra -segun ela bisa- ku no ta atendé ku e problema pa kaba.

Kultura?

Hopi hende na St. Eustatius ta kontra e pensamentu di Knops. Nan ta mustra ku e krio di bestia, spesialmente kabritu, ta forma parti di kultura i tradishon di e islanan aki. Na Saba, kaminda ku gobièrnu a kuminsá tira kabritu ku ta kana lòs den mondi, ta skucha sonidonan similar.

Otro habitante, sinembargo, sí ta di akuerdo ku mester redusí e kantidat di kabritu ku ta kana den naturalesa. Na St. Eustatius, aparte di kabritu, tin hopi otro bestia ta kana lòs, manera baka i porko. Espesialmente e bakanan ta kousa hopi molester i daño na hardin di hopi siudadano na e isla.