KRALENDIJK – Diferente organisashon di kuido na Boneiru ta traha huntu pa ofresé personanan ku sobrepeso òf obesitas un programa spesial. E programa aki yama Intervenshon di Estilo di Bida kombiná (GLI) i ta dura dos aña. E ta yuda personanan pa biba mas salú i sinti nan mes mas fet.

Guiadónan di estilo di bida di Fysio di Bario i Sentro di Salú Bon Bida Boneiru ta ehekutá e programa. E guiadónan no ta yuda e partisipantenan pa pèrdè peso so, pero tambe pa siña nan un estilo di bida salú i pa mantené esei. Nan ta traha pa kada partisipante un plan personal ku ta pas ku nan situashon.

Dòkternan di kas na Boneiru ta hunga un ròl importante den e programa aki. E enfermeranan di apoyo di e konsultorionan di dòkternan di kas a haña un entrenamentu na komienso di luna di yüni. Den e entrnamentu aki nan a siña kon nan por  motivá i sostené personanan ku sobrepeso òf obesitas. JOGG a duna e entrenamentunan, huntu ku e ehekutornan di GLI i e partisipantenan a haña un sertifikado.

Den e último añanan a tèst e programa na Boneiru ku un proyekto piloto. A base di e eksperensianan ku a haña ku e proyekto piloto aki a hasi adaptashonnan pa hasi e programa mas apopriá pa e hendenan na Boneiru.