KRALENDIJK – Riba 12 di mart Boneiru a dal un stap importante den protekshon di su fuentenan di awa natural. Diputado Cicilia i ministerio di Infrastruktura i Maneho di Awa a duna inisio na un proyekto kaminda ta bai instalá tubu pa peilu pa midi e kalidat i kantidat di awa bou di suela.

E proyekto aki ku ta bai dura tres luna i ku ta bai ehekutá huntu ku Rijkswaterstaat, ta krusial pa haña bista den e moveshonnan di awa bou di suela di e isla. “Esaki ta un stap importante pa protehá e naturalesa bunita di Boneiru, nos awa balioso i e koral pa futuro generashonnan,” segun diputado Cicilia.

E tubunan pa peilu aki ta hasi posibel pa kontrolá e kantidat i puresa di e awa di suela, i na mes momento e impakto di awa di suela riba awa di laman i e koralnan. E investigashon ta dirigí tambe riba e efekto di deskarga di awaseru riba tantu agrikultura komo e kalidat di awa. E proyekto, ku ta start sùit di Boneiru, ta inkluí diferente organisashon i lo kontribuí na un mihó maneho di awa i mehorashon di agrikultura.

Diputado Cicilia ta enfatisá e importansia di tubunan pa peilu: “Instalando e tubunan pa peilu aki, nos ta haña informashon balioso di nos awa di suela. Ta esensial ku nos awa ta limpi pa konservashon di nos naturalesa i pa protekshon di nos koral”. E tubunan pa peilu ku a pone ta keda algun aña aktivo pa kontrolnan periódiko.