Riba promé di yüli 2024 a lansa e aplikashon BerichtenboxCN. BerichtenboxCN ta un èp pa servisionan gubernamental na Hulanda Karibense. Bo ta risibí bo mensahenan di gobièrnu rápido i sigur i bo tin nan semper na man. 

Belastingdienst Hulanda Karibense ta e promé servisio ku ta hasi uso di e èpBerichtenboxCN. Bo ta risibí mensahenan di Belastingdienst rápido den bo buzon di mensahe digital, bo tin e informashon semper na man i bo por hasi uso di dje komo referensia/archivo. Tambe si bo no ta biba henter aña na Hulanda Karibense, bo ta risibí bo mensahenan tòg normal pa medio di e èp. Segun plan lo amplia e BerichtenboxCN ku otro servisionan gubernamental tambe. 

Ta kuminsá promé ku mensahenan di e departamentu di Imposishon di Belastingdienst i despues ta sigui e sekshon di Kobransa. Mensahenan ku bo ta risibí ta entre otro invitashon pa hasi deklarashon, aanslag, petishon pa paga, rekordatorio pa paga, petishon pa informashon adishonal, desishon riba un opheshon.

Kon ta usa e App BerichtenboxCN ?
Pa baha e èp BerichtenboxCN bo tin mester di un kuenta di MijnCN (ku verifikashon úniko), bo number di crib i un ‘smartphone’ òf ‘tablet’. E èp ta adekuá pa ‘smartphone’ i ‘tablet’ Android i IOS, pa kua a tene kuenta tambe ku vershonnan mas antikuá di e sistemanan akí.