KRALENDIJK – Bonaire Holding Maatschappij (BHM) a entregá e kuentanan anual di e aña 2023, ku deklarashon di akountent aprobá, di BOG (Bonaire Overheidsgebouwen) i BonLab (Bonaire Laboratorium) riba 4 i 18 di juni na e entidat públiko di Boneiru.

Segun e akountent independiente, e sifranan ta duna un imagen realístiko di e situashon finansiero di e dos nv-nan gobièrnu.

“Despues di hopi aña nos a logra pa BOG i BonLab, konforme e statuto, e sifranan anual kontrolá i aproba pa 2023 na tempu. Ku esaki, BOG i BonLab ta e promé dos nv bou di BHM ku ta up-to-date ku e kuentanan anual kontrolá”, direktora di BHM, Susana-Jansen a bisa.

Mehorashon

Susana-Jansen, ku ta direktor for di novèmber 2020, ta bisa ku su trahamentu a enfoká riba mehorashon di e Corporate Governance di e nv-nan ku ta kai bou di BHM. “Nos ta hopi kontentu ku nos a yega asina leu i nos ta wak dilanti pa keda kla e kuentanan anual kontrolá pa e otro kompanianan tambe te ku 2023 den tempo. Mi meta ta e kompania ku ta kai bou di BHMe ta keda up-to-date ku nan maneho finansiero, konform prinsipionan di bon gobernashon i e statuto.”