MILAN- Un delegashon di Boneiru entre dia 10 I 12 di òktober a partisipá den e konferensia 2021 World Routes, ku e aña aki a tuma lugá na Milan, Italia. 

E delegashon di Boneiru tabata konsistí di Miles Mercera komo director di TCB, Marco van der Kreeke di BIA i konsehero Howard Mann. 

Segun Mercera a hiba konberashon fruktífero ku vários partido. “Nos a papia ámbos ku partidonan interesante komo partidonan nobo. Nos a splika nan kiko Boneiru ta para p’e I ki sorto di turista nos ke atraé”. 

Interes

Durante e konferensia di turismo, ku a tende fin di sèptèmber konsehero Mann a duna un presentashon tokante aerolíneanan ku potensialmente lo tin interes di kuminsá sirbi Boneiru. Segun Mann tin vários aerolínea ku tin e interes, pero tambe nan ta studiando merkado ainda, en espesial awor ku apenas mundu ta saliendo for di e krisis di Covid. E krisis a laga hopi kompania di aviashon tambaleando ku pérdidanan enorme, dor di espasio será kasimentu rònt mundu.