KRALENDIJK- Lider di Partido Demokrátiko Boneriano (PDB), Clark Abraham  i Union Patriótiko Boneriano (UPB), James Kroon ta e dos polítikonan ku a risibí mas tantu voto den elekshon pa Konseho Insular di 15 di mart 2023. 

Abraham a logra un total di 1.635 voto personal, mientras ku esaki tabata un kantidat di 1.391 pa James Kroon. Den e kantidat di voto personal Hennyson Thielman a bin nan di tres lugá ku 855 voto personal i Daisy Coffie (M21) a bin na lugá kuater ku un totaal di 440 voto personal. 

Otro hende ku a haña bastante voto personal tabata Tati Frans ku 320 voto personal i Rolanda Hellburg-Makaai ku 274 voto personal. Ambos ta kandidato di DP. Despues di nan ta bini Benito Dirks (UPB) ku 266 voto personal, siguí pa Delno Tromp (DP) ku 250 voto personal. 

Tjin Asjoe

Un kandidato ku a haña masha tiki voto, tumando na kuenta ku te ku un par di dia pasá tabata lider di partido MPB ta Elvis Tjin Asjoe. Ku 93 voto ela logra haña ménos voto personal ku hendenan manera Edwin (Din) Domacassé (115 voto) i Renata Domacassé (95 voto).