KRALENDIJK- Dutch Caribbean Nature Organization (DCNA) den último tempu tabata aktivo ku promoshon di un agènda ku enfoke riba naturalesa, na Hulanda i riba nivel internashonal. 

Un di e tantísimo metanan di DCNA ta pa promové maneho i propagá trabou, tantu den Hulanda komo riba tereno internashonal. Huntu ku e miembronan di DCNA su direktiva, e fundashon di ret di kontakto pa organisashon di konservashon a move aktivamente pa atendé ku polítikonan i agentenan di skirbi maneho pa por enfatisá e importansia di konservashon di naturalesa denter di Karibe Hulandes. Akibou ta sigui algun di e logronan di e trabou importante akí den e lunanan tras di lomba:

Finalmente Konseho di Minister di Hulanda a aprobá riba djabièrnè 8 di yüli e lei di realisashon di e parke marino pa mamífero i tribon ‘Yarari Marine Mammal and Shark Sanctuary’. Esaki tabata un siguiente paso importante den protekshon di tribon, bayena i dòlfein den e awanan di Boneiru, Saba i Statia. For di momentu di apuntashon di e parke Yarari na 2015, DCNA tabata aktivamente embolbí den konsipiá e lei di realisashon i e organisashon ta kontentu di mira ku finalmente ta realisando e struktura di manehá e santuario.

Bishita

Na mei, komo parti di e bishita di trabou di DCNA na Hulanda, DCNA su direktor Tadzio Bervoets i presidente di direktiva Hellen van der Wal a presentá DCNA su Plan di Akshon pa Klima na Karibe Hulandes, na e Ministerio di Asuntu Interno i Relashon denter di Reino (BZK) i na e Ministerio di Klima ku un súplika na Gobièrnu di Hulanda pa traha aktivamente huntu ku stakeholdernan pa hasi Karibe Hulandes resistente na kambio di klima. Tambe a presentá e plan na e Parlamentarionan Jorien Wuite i Lammert van Raan durante un master charla ku nan a tene na Pulchri Studio na Den Haag.

DCNA ta bisa di lo kontinuá traha aktivamente pa yega na un forma di sosten mas strukturá pa Konservashon di Naturalesa denter di Hulanda Karibense.