Kralendijk – Riba dia 23 di òktober 21 hóbennan a usa nan talento kreativo pa transformá e klikonan bèrdè di Selibon den un obra di arte. Na Hòfi Kultural studiantenan di Scholen Gemeenschap Bonaire, Forma, Forsa, VMBO i Liseo a pinta bou di guia di artistanan lokal, diseñonan úniko ku ta ilustrá naturalesa i sostenibilidat. E aktividat aki ta forma parti di e Sushi òf Dushi Kliko Challenge. Lo duna premionan na e skolnan i studiantenan pa e klikonan mas favorito.

Djasabra pasá e ambiente tabata bon na Hòfi Kultural. Disfrutando di muzik i ku hopi entusiasmo, e hóbennan a pinta e kreashonnan ku nan mes a pensa riba e klikonan. Riba e klikonan pintá tin ilustrashon di shushi, deporte, diferente flor i animal, paisahe, i e mundu abou di awa. Un par di e klikonan tin tekstonan ku ta motivá hende pa tene Boneiru limpi i pa protehá animalnan. E studiantennan ta asina impreshoná di e klikonan ku a bira un obra di arte, ku nan ta di opinion ku aworaki mester usa solamente saku di shushi pa tene e klikonan limpi. Algun alumnonan lo ke bai kas ku e klikonan. 

E dia di pintamentu a kuminsá ku un presentashon di material edukativo di STINAPA, tokante naturalesa i dikon mester depositá i separá shushi na un manera korekto. E lès tambe a fungi komo inspirashon pa pinta e klikonan. E lès a inspirá e studiantenan pa partisipá den un clean-up. E hóbennan no a usa nan kreatividat solamente pa pinta e klikonan, pero tambe pa traha un rèp tokante e manera adekuá pa atendé ku shushi i e importansia pa protehá naturalesa. Juriëlla Josephia a skibi i graba e rèp, bou di guia di Jo Coffie (Jo Café Music). 

E kolaborashon entre artistanan i hóbennan tababata inspirativo. Tur hende a yuda otro pa siña téknikanan nobo, traha diseño i pinta e klikonan mas bunita posibel. E proseso kreativo tabata otro serka kada grupo. Algun grupo tabatin un idea kreativo adelantá i otronan a usa nan fantasia durante e pintamentu di klikonan. E ánimo pa partisipá un biahe den un Kliko Challenge ta grandi i ku hopi entusiasmo e hóbennan lo warda riba un proyekto similar.  

Huradonan lo huzga e nuebe klikonan pintá riba dia 5 di nòvember durante un evento será. Komunidat di Boneiru tambe por vota riba e página di Facebook Boneiru Duradero i página di Instagram Sushi òf Dushi for di 29 di òktober. Lo kompartí e rèp riba social media i radio tambe. Durante e evento será lo duna premionan na e skolnan i studiantenan pa e klikonan mas favorito.

E Sushi òf Dushi Kliko Challenge ta un inisiativa di Wereld Natuur Fonds, Entidat Públiko di Boneiru i Selibon N.V. den kolaborashon di Tourism Corporation Bonaire, STINAPA i Fundashon Plataforma Kultural. Caribbean Homes ta e spònser prinsipal di e proyekto aki i Krioyo Paints tabata e spònser e materialnan ku tabata mester pa e pintamentu. E Sushi òf Dushi Kliko Challenge ta un proyekto pa hasi hóben i adulto mas konsiente di e importansia pa kuida nos naturalesa.