KRALENDIJK – Un kantidat di 19 kadidato potenshal pa bira komisario den kompania djabièrnè na Marriott hotel a risibí nan sertifikado di un kurso di kuater luna ku nan a sigui, i ku a wòrdu duna pa Themis Institute di profèser Frank Kunneman, un eksperto riba e tereno di Good Governance den kompania. 

E kurso a keda organisá pa e Bureau Deelnemingen die Entidat Públiko Boneiru (OLB) i a trata vários aspekto di tenemento di supervishon riba maneho di kompania. 

Ámbos e dosentenan ku e diferente partisipante a mustra nan mes hopi entusiasmá ku e partisipashon i loke nan a siña. “E materia tin biaha por parse ‘seku’, pero mas bo ta siña, mas bo ta bin komprondé kon tur kos ta bini huntu i di e forma ei, e ta bira interesante”, asina partisipante Renan Rodriguez a bisa. 

Satisfecho

Hefe di Bureau Deelnemingen, George Mensché tambe a keda hopi kontentu ku e interes i e resultado. “Den promé instante tabata difisil pa haña sufisiente hende pa partisipá, pero despues ku nos a duna informashon, entre otro na radio, di e pakiko di e kurso, tòg nos a haña hopi hende ku a interesá pa sigui kurso.

Detaye intersante ta ku gezaghèber Nolly Oleana i George Mensché mes tambe a partisipá den e kurso. “Den komienso mi duda si mi mester partisipá, pero na e momento ei mi a rasoná ku ta pa un par di luna so mi lo tabata gezaghèber interino”, asina Oleana a trese dilanti. E realidat a resultá diferente.

Oleana a bisa ku e kurso tabata un hopi intensivo, pero tambe unu ku e no ker a pèrdè. Tin biaha bo no ta realisá kuantu kos tin de e parti di forma parti di un hunta di komisario, pero nos a siña hopi mes”.