KRALENDIJK – Djasabra dia 15 di yüni último, a tuma lugá e di 10 kompetensia di lesa di skolnan básiko ku Fundashon Lesa Ta Dushi ta organisá pa muchanan di 7 pa 12 aña.

E kompetensia a tuma lugá den e sala espasioso di SPKB (Stichting Professionele Kinderopvang Bonaire). E banda hubenil Kara Kòrá, bou di guia di señor Albert Crestian, a toka i kanta himno di Boneiru. Pastor Michael Paris di ADRA a hiba palabra i un bunita orashon. Diputado señora Nina den Heyer tambe a hiba bunita palabranan pa enkurashá e kandidatonan. Binti  kandidato repartí den shete skol básiko lokal, a partisipá na e kompetensia importante aki ku FLTD ta organisá, pa motivá e grupo akí tambe pa lesa.

Tur kandidato tabata bon prepará dor di nan maestronan i mayornan. Huradonan tabata Xiomara Frans, Elvio Cecilia, Elsmarie Beukenboom i Niyana Faneite ku tabatin e funshon di presidente di hurado. Maestro di evento tabata Fernon Koeiman. E kompetensia tabatin tres parti, promé parti ta kategoria 7 pa 8, 9 pa 10 i 11 pa 12 aña. Durante pousa Tio Ali (Alvin Isenia) i Kara Kòrá a entretené tur presente ku bunita kantikanan. E bukinan ku a ser usá durante e kompetensia tabata di outor Monica Clarinda.

Resultado 

Tabata Kolegio San Luis Bertran, representá pa Raneysha Bernabela, ku a bai ku e promé premio den kategoria di 7 pa 8 aña. Kolegio San Luis Betran, representá pa Neymar Janga, ta ganadó den kategoria di 9 pa 10 aña. Den kategoria di 11 pa 12 aña tabata Juliandrick Janga tambe di Kolegio San Luis Bertran ku a bai ku e promé premio. Nos por bisa ku e huradonan tabatin un tarea hopi dífisil, komo ku tur partisipante tabata bon prepará i esaki ta algu di aploudí i elogio sigur na tur e shete skolnan. Pues tur kandidatonan tabata hopi fuerte. Nos a saka di dos i tres premio tambe. Pa e kategoria di 7 pa 8 aña a sali na di dos lugá Aaleah Martina di BS de Pelikaan i na di tres lugá  Vione Burnet di Skol Amplio Papa Cornes. Pa loke ta trata kategoria 9 pa 10 aña a sali na di dos lugá J’Dee Miguel di BS de Pelikaan i na di Izhar Jacobs di BS de Pelikaan i na di tres lugá a sali Rü’édeley Winklaar di Skol Amplio Papa Cornes.

Spònsernan 

Un imenso palabranan di gratitut ta bai pa Cargill Salt Bonaire ku, ya pa basta aña kaba ta e spònser prinsipal pa e kompetensia aki. FLTD ta gradisí tambe direktiva di SPKB di kurason pa fasiltá nos e sala espasioso di Iglesia Dios ta amor. Sin boso koperashon e kompetensia akí lo no por a tuma lugá. Tambe nos ta gradisí tur direktiva di skolnan, maestronan i mayornan ku a bin apoyá e muchanan durante e presentashon. Boso presensia tabata altamente apresiá i di gran balor pa boso muchanan i nos fundashon. 

Rekonosementu

Durante e kompetensia nos fundashon a regalá señor Pieter Smit, nos fotógrafo ku pa hopi aña ta saka pòtrèt di nos aktividatnan, un plaka di mérito. Ademas a duna rekonosementu na entre otro direktiva di Cargill Salt Bonaire, direktiva di SPKB, direktiva di Kara Kòrá, famia Paris i tur skolnan un sertifikado di rekonosementu.