KRALENDIJK – Riba 28 di yüni Parke Isidel lo organisá e promé anochi di sine, riba e anochi aki lo bai pasa e dokumental “E último biahe di Isidel” ku ta konta e historia trágiko di e suseso di 25 di yüli 1978; un tragedia ku a marka e komunidat di Boneiru profundamente.

Pa medio di kuenta oral i imágennan históriko, e dokumental ta duna un bista emoshonante riba e evento. E dokumental ta keda guia pa vários momentu den historia i ta duna un perspektiva riba e sintimentu i eksperensianan di esnan ku a biba e suseso. E dokumental ta komplementá ku entrevistanan di famianan i testigunan, ku ta kompartí rekuerdonan i emoshonnan.

E anochi di sine lo kuminsá mitar di 8 pa 9or di anochi i ta habri pa tur hende i ta kompletamente gratis. Ta un oportunidat perfekto pa famia, amigunan i bishitantenan bini huntu i disfruta di un anochi diferente. Nos ta rekomendá pa tur hende bini ku nan propio stul pa por sinta den komodidat i disfrutá di e sine. Ademas, nos kioskonan lo ta habri manera semper, pa ofresé vários opshon di kome i di bebe.

E dokumental aki ta un produkshon di Fundashon Históriko Kultural Boneriano (FUHIKUBO) den koperashon ku Bonaire Overheidsgebouwen (BOG) NV i lo ta e promé anochi di sine den Parke Isidel. E dokumental lo tin suptitulo na ingles. E intenshon ta pa organisá eventonan kaminda siudadanonan i bishitante por bini i pasa un ratu ameno ku otro den Parke Isidel. BOG NV i FUHIKUBO ta invitá un i tur pa bini i disfrutá di e anochi memorabel ku ta sirbi komo un homenage na e víktimanan.