KRALENDIJK – Èks-dj Wietze de Jager di Qmusic a start un akshon pa rekoudá 100.000 euro pa banko di kuminda na Boneiru. For di e komienso djadumingu último e akshon a generá 67.365 euro kaba. 

E akshon ku ta ámpliamente komentá via app- i medianan sosial ta hañando enormemente hopi sosten. De Jager a hasi e resultado temporal konosí djarason atardi i a ekspresá su gratitut. “Mi no a fèrwagt ku lo a bai asina rápido. Mi a keda ketu un ratu. E reakshonnan ta asina konmovedó,” segun De Jager den un reakshon pa Bonaire.nu.

Sosten masal for di tur skina

Hendenan por kontribuí simpel na e inisiativa via Tikkie. Esaki a pèrkurá djadumingu sinembargo djis despues di e anunsio aki pa problemanan pa motibu di un fayo tékniko serka Ideal. Apesar di e kontratempu aki e sosten a keda grandi.

No solamente personanan partikular a reakshoná entusiasmá; empresarionan lokal na Boneiru tambe a duna di nan parti. Diferente empresa a duna donashon den forma di estadia i sena, ku kua nan kier a duna e akshon èkstra forsa.

Storianan konmovedó 

De Jager ta konmové pa e hopi storianan personal ku e ta risibí. “Varios hende ku un tempu tabata dependé di e banko di kuminda, a hasi awor un donashon. Esei ta pone bo kurpa kue rel di bèrdat,” e ta konta. “E akshon ta sigui ainda te ku djaluna. Empresarionan na Boneiru tambe por registrá nan mes ainda pa yuda’”

Ku un siman mas pa bai e èks-dj ta spera di alkansá e montante deseá di 100.000 euro. Ku esaki 100 famia na Boneiru por probechá un aña largu di paketenan di kuminda. E banko di kuminda na Boneiru ta yuda habitantenan ku tin problema pa nan sèn yega pa biba i por usa e sosten finansiero bon.

Bo ke kontribuí?
Bo por kontribuí via e Tikkie-link ku De Jager a kompartí riba su media sosial. Kada euro ta yuda pa sostené famianan na Boneiru.