KRALENDIJK – Djasabra 22 di yüni 2024 lo tin un evento speshal na Corallium Hotel, unda strukturanan familiar Afro-Karibense i e konsepto di ‘Yu sin doló’ ta keda presentá. 

E evento aki ta ofresé un bista profundo den un forma úniko di kuido i edukashon ku ta hundi firme den komunidat Afro-Karibense. E anochi lo ta yená ku storia personal i perspektiva profesional di un grupo diverso di oradónan, manera Nicole Terborg, un periodista prominente Hulandes i yu di e famosa aktris Surinames-Hulandes Jetty Mathurin. 

Nicole lo kompartí su búskeda personal tokante su lantamentu komo ‘kweekje’, manera e ta deskribí den su podcast ‘Kweekje, mi kwekipikin’. Tambe Mimi Frans di Rincon, i Shaedra Baromeo lo kompartí nan eksperensianan komo dunadó di kuido den konteksto di ‘Yu sin doló’, huntu ku sikiater di mucha i hubentut Eugenie Curiel, ku lo kompartí su perspektiva profesional tokante salú mental i edukashon den komunidat Karibense, enfatisando e influensianan kultural riba desaroyo di mucha. 

Meta 

E evento gratis tin komo meta ampliá e konosementu tokante e papel esensial di ‘Yu sin doló’ den komunidatnan Afro-Karibense i e impakto ku esaki tin riba muchanan i famianan.