KRALENDIJK- Aktualmente tin un biahamentu bai i bin pa Hulanda pa loke ta trata gobièrnu di Boneiru, Konseho Insular i tambe bou di sierto ámbtenar ku ta dunando e impreshon ku tin sèn pa no kaba nunka mas. 

Banda di e echo ku e biahamentu eksesivo aki ta gastando sèn di pueblo, ta realmente preokupanto ku aparente kasi hinter gobièrnu por biaha na mes momento manera nada no pasa. 

Den e último dos siman tras di lomba un delegashon di no ménos ku un 20 pa 25 hende di parti di gobièrnu i konseho insular a biaha bai Hulanda pa entre otro kongreso di munisipio hulandes (VNG). Entre otro a biaha hinter konseho insular, empleadonan di griffie, gezaghebber interino Nolly Oleana, futuro gezaghèber John Soliano, tur tres diputado, empleadonan di Bureau Eilandssecretaris i un kantidat di hende ku ta traha den büro di diputado. 

Kaminda ku por komprondé ku ta útil i importante pa un delegashon di e órganon di gobièrnu ta presente na aktividatnan na Hulanda, den kambio di gobièrnu Hulandes i tambe na kongreso di VNG, ta difísil pa kompronde ku tin ku biaha ku asina tantu hende pareu. Es mas, a laga hinter gobièrnu di e isla blo bashí, ku solamente gezaghèber interino Ingrid Sealy presente na e isla.

Ku esaki, literalmente a surgi diferente situashon ku mester a firma dokumentonan di importansia i urgensia,  sin ku tabata tin sufisiente hende pa firma na nòmber di gobièrnu

No tin maneho konkreto

ABC Online Media den dianan ku a pasa a papia ku seis diferente representante di gobièrnu na diferente nivel, ku tur ta atmití ku no tin maneho konkreto pa determiná kuantu hende ta biaha pa un sierto evenemento, òf kuantu dia nan por keda afó. Tampoko ta parse di tin un kordinashon kuantu diputado, gezaghèber òf miembro di konseho insular por biaha pareu. 

Pa motibu di falta di un maneho no por evitá tampoko ku tin un gastu muchu mas haltu ku estriktamente nesesario. Ta bon pa realisá ku kada persona ku ta biaha pafó di Boneiru tin derecho riba entre otro daggeld, pero tambe hotèl pagá i hopi biaha kuminda banda di e daggeld. Asina e gastunan pa un solo persona ta laba den entre 5.000 pa 10.000 dòler pa persona, kontanto preis di pasashi aden. 

Durashon

Aparte di e hecho ku a biaha ku un delegashon sumamente grandi, tin persona ku ta keda hopi largu nan Hulanda, minimalmente un siman pero den mayoria kaso por lo ménos 10 dia, i den sierto kaso mas bien entre 2 pa 3 siman. 

Di e forma aki, diferente di e personanan konserní ta ‘traha plaka’ ku por monta bira manera un fuente di entrada ku ta na mas ku un salario promedio na Boneiru. Tambe tin kasonan ta wòrdu tresé na konosimentu di ABC Online Media di hende den e tipo di biahenan aki delegashon ku ta bai keda serka famia, pero por kobra e plaka di estadia, ku normalmente lo a paga na hotèl. Esaki no ta prohibí, pero ta hasi e tipo di biahenan aki mas lukrativo pa esnan konserní.

Kòntròl?

Pregunta grandi ta ken ta kontrolá si e plakanan pagá na miembro di delegashon ta realmente nesesario i hustu (rechtmatig en doelmatig). Pa falta di un maneho konkreto, ta parse manera esnan ku ta biaha pa Hulanda mes por lanta disidí ki dia nan ta biaha, ki dia nan ta bin bèk i asina kuantu dia tin gastu di hotèl i di daggeld. Tambe ta un pregunta kon rigoroso e kòntròl ta riba bònnan ku mester entregá relashoná ku e tipo di biahamentu aki. 

Mester enfatisá ku no ta bou di e gobièrnu aktual só e práktikanan aki ta tumando lugá, pero sí tin e impreshon ku na lugá di ménos e ta birando mas, i tambe sin ningun tipo di berguènsa. Tambe ta nota ku for di dia ku a stipulá kondishonnan nobo pa miembronan di konseho insular pa loke ta trata nan daggeld i otro kondishonnan, tin manera un furor pa biaha bou di konsehalnan, ku por sierto ta inkluí e grifier interino mes tambe.