MEDELLIN- Un hòmber hulandes a kousa un skandal bastante grandi na Medellin, ora ela sali kana ku su pareha, bistí solamente na lingerie i mará na un kadena den Parque Lleras na Medellin.

Segun e hòmber, Patrick Slurink, e akshon tabata pa filma algu pa pone riba su kanalnan di Social Media. Hinter e suseso a keda filmá. Kos a tuma un buèlta ménos alentador ora hende den públiko a kuminsá ataká Slurink verbalmente, bisando ku ta abusu pa kana ku un hende muhé di e forma ei.

Hopi hende a pensa ku ta trata di un akto ku un prostituta, pero e muhé a resultá di ta pareha di Slurink. Despues ku asta alkalde di Medellin, Daniel Quintero Calle, a kondená e akshon di e hulandes, departamenti di imigrashon a interogá Slurink i su amiga, promé ku a laga esakinan bai.

Media

Hinter e suseso a kousa un furor den media na Colombia. Diferente kanal di televishon a pasa imagennan di e suseso. Organisashonnan di hende muhé a bisa ku ta kometiendo hopi abusu kontra di muhé kolombiana i ku e kos aki ‘no por’.

Na otro banda tin hende ku ta bisa ku mihó polis konsentrá su mes den aktonan kriminal den e área. Parque Lleras tin fama di un lugá kaminda tin hopi prostitushon i uso di droga ta tumando lugá, pero tambe un lugá kaminda hopi estranhero ta bira viktima di robo i otro kos mahos.