KRALENDIJK- Djadumingo AworBonaire a haña hopi pregunta di siudadano ku tabata puntra na kua bùbel gezaghèber Edison Rijna tabata referí durante konferensia di prensa dos siman pasá. 

Riba pregunta di un periodista na gezaghèber tokante reinstitushon di e asina bùbel aereo entre e islanan ABC, Rijna a reakashoná afirmativo, bisando ku ta papiando ku e otro islanan pa wak si por reestablesá e bùbel di aki.

Mester bisa ku for di dia ku Rijna a trese esaki dilanti tabata tiki probabel ku Kòrsou i/o Aruba lo a tuma aden pa bai bèk den un bùbel ku Boneiru, mirando ku Boneiru no ta logrando pa kontené e brote mas resien di Covid-19. Mientrastantu, Kòrsou sí a realisá ku Boneiru tin un problema serio, i a elevá e nivel di riesgo di Boneiru pa un pais di ‘riesgo hopi haltu’. Esaki ta nifiká ku biahero for di Boneiru no solamente mester hasi un tèst di PCR pa por biaha bai Kòrsou, pero tambe mester hasi un tèst antígeno adishonal riba e di tres dia despues di yegada na nos isla hermana. 

Kómiko

Loke ta mas kómiko ainda ta e echo ku awor aki ku e grado di kontagio na Kòrsou no ta haltu mas, tòg Boneiru di su banda tampoko no ta kita obligashon pa pasahero hasi tèst di PCR pa por biaha bèk pa Boneiru. 

Aunke gobièrnu di Boneiru no por disidí pa Kòrsou ki eksigensia nan ta establesé pa biahero di Boneiru por drenta e isla, Boneiru sí tin den su propio man pa kita e rekesito di PCR pa hende biaha di Kòrsou pa Boneiru, pero no ta hasiendo esaki. 

Ku esaki por konkluí ku e bùbel aero por lo pronto lo no bin bèk pa aliviá e situashon di masomenos 250 dòler ku mester gasta na tèst, sin konta e preis di pasashi aden. Un situashon ku ta pone ku hopi habitante di Boneiru no por, ni ke biaha mas pa Kòrsou.