KRALENDIJK- Pa djadumingu tin 10 kaso nobo di Covid-19 na Boneiru. E kantidat total di kaso sinembargo a baha te na 114, ya ku tin mas hende ku a rekuperá, kompará ku e infekshonnan nobo. En total e sifra a baha ku 19 kaso.

Mientras ku e bahada aki ta parse bon, mester tuma na kuenta ku e porsentahe di tèstnan positivo (10) riba e kantidat di hende ku a pasa tèst (44) ta kasi 23%. Esaki por konsiderá komo un porsentahe hopi haltu, i asta mas haltu ku tabata e kaso den dianan tras di lomba.

Aktualmente tin 5 hende ku ta interná na Fundashon Mariadal pa motibu di síntoma di Covid. Dos di e personanan aki ta risibiendo kuido intensivo.

Segun sifranan di RIVM na Hulanda, aktualmente Boneiru tin 4 biaha mas kontagio kompará ku Kòrsou, kontá pa kabes di poblashon, i kasi 6 biaha mas tantu ku ta e kaso na Aruba.