KRALENDIJK- Klientenan aktualmente ta wardando mas largu pa risibí nan remidi na botika di Fundashon Mariadal ku tabata e kaso algun tempu atras. Esaki a sali na kla durante un konferensia di prensa ku e fundashon a tene djarason mainta. 

“Ántes e tempu pa warda tabatin un averahe di ménos ku 15 minüt, pero durante e último simannan esaki a subi bai na 19 pa 21 minüt. Nos ta verwagt ku esaki lo sigui oumentá den luna di yüli i ougùstùs”, segun Mariadal. 

Un di e motibunan pa e echo ku pashèntnan tin ku warda mas, tin di haber ku falta di empleado. “Lamentablemente durante e lunanan tras di lomba nos botika a hañ’é konfrontá ku falta di personal. Mariadal ta reklutando aktivamente, kaminda nos preferensia ta bai pa personal for di den region karibense”. 

No bini mesora

Mariadal a splika tambe ku nan ta implementando vários inovashon pa duna mihó serviso na pashènt ku tin mester di remedi. Alabes ta pidi kliente pa solamente den kaso di emergensia bin buska nan remedi mesora. Den otro kasonan ta konsehabel pa warda dos dia promé ku buska e remedinan.