KRALENDIJK- Aunke e riel nobo ku a pone riba Kaya Gobernador Debrot no ta gustá pa tur hende, e mesun riel na e promé parti di e kaminda pa Sabadeco ta lantando hopi interogante di ámbos shofer i peatón ku resientemente a pasa riba e pida kaminda en kestion. 

Aunke e riel riba Kaya Gobernador Debrot almenos ta sirbi pa separá peatónnan for di e kaminda pa asina i protehá nan kontra outo òf otro tráfiko ku ta pasa. Sinembargo, e riel riba e kaminda pa Sabadeco ta parse di por tin un efekto totalmente kontraproduktivo pa e peatónnan.

Esaki pa motibu di e echo ku si un shofer mester pèrdè kòntròl riba su vehíkulo, tin un chèns real di por plècha e peatón, ya ku esaki ni tin kaminda pa hala un banda, òf ala bula bai na banda  pa e tráfiko biniendo den su direkshon. 

Studia

Diputado Anjelica Cicilia riba pregunta di ABC Online Media ta bisa ku e no tabata na altura ku lo a traha e riel na e parti di kaminda aki tambe.  “Nos ta bai internamente studia si esaki ta nesesario i deseabel. Tin otro kaminda riba e isla kaminda ku e riel por ta mas útuk”, asina Cicilia a bisa.

Informalmente, ABC Online Media ta tende for di diferente fuente ku ta probabel ku no solamente ta bai para e trabou, pero ku tin hopi chèns ku esaki lo asta wòrdu kitá riba e pida kaminda en kestion.