Kralendijk – Na e konferensia ‘Trahando pa nos grandinan’ diferente organisashon pa hende grandi a pone énfasis riba e importansia pa traha huntu ku otro. Nan a para ketu tambe na e trabou ku nan a hasi den aña 2024 pa hende grandi. 

E konferensia a tuma lugá 2 di dezèmber 2024 i ta forma parti di e maneho pa hende grandi. Den e maneho hende grandi ku ta aktivo i ta partisipá den komunidat, ta para sentral. Tin atenshon tambe pa e hende grandinan mas vulnerabel ku por ehèmpel demensia, i hende grandi ku tin mester di kuido intensivo i no ta biba na kas mas.

Den e promé parti di e konferensia a papia tokante kon hende grandi por keda aktivo i partisipá na komunidat i kiko nan tin mester pa esei. Práktika ta mustra ku hende grandi na Boneiru ta haña importante pa okupá nan mes ku kultura lokal. E hende grandinan ku por ehèmpel ta bini huntu na Hòfi Kultural pa toka nan músika, ta un bon ehèmpel di esaki

E partisipantenan na e konferensia a papia tokante e konosementu i e rekursonan ku hende den kuido tin mester pa yuda hende grandi mas mihó posibel. Hendenan ku ta duna mántelzòrg meresé atenshon i sosten spesial pa e tarea importante ku nan tin den kuido pa hende grandi.

Den e di dos parti di e konferensia a papia entre otro tokante kon hende grandi por haña yudansa den un forma rápido i fásil. Por ehèmpel via Aksesibel. Hende grandi por bai e lokèt akí ora nan tin mester di yudansa riba diferente tereno. Un otro manera pa yuda hende grandi den un forma rápido i fásil, ta pa ofresé yudansa den bario.

‘Trahando pa nos grandinan’ ta un inisiativa di e ‘Cockpitgroep’ Aliansa den Kadena pa Kuido di Hende Grandi (Cockpitgroep Ketenalliantie Ouderenzorg – CKO). E grupo akí ta un kolaborashon ofisial entre entidat públiko Boneiru, Sentro Akseso, Fundashon Mariadal, Zorg en Welzijn Groep i ZJCN. Hopi organisashon pa hende grandi ta sostené trabou di e gruponan ku a tuma inisiativa pa e konferensia.

Durante e konferensia ‘Trahando pa nos grandinan’ a lansa e kampaña ‘Mi ta’. E kampaña ta konsistí di un seri di videoclip ku hende grandi di Hòfi Kultural. A traha e seri pa duna honor na nos hende grandinan boneriano i pa mustra kon hende grandi por ta aktivo ainda na nan edat. Riba e página di facebook di Hòfi Kultural por mira e grabashonnan akí.