KRALENDIJK- Entre 4 pa 13 di desèmber 2024, Konseho Insular di Boneiru ta realisá un bishita di trabou na Hulanda. E bishita ta enfoká riba kompartí konosementu, krea kontakto i fortalesé relashonnan ku vários instansianan i partnernan den Reino.

E bishita a kuminsá dia 4 di desèmber ku un enkuentro di komishon di investigashon di Boneiru, ku ta konsistí  di Rolanda Hellburg-Makaai, Cyrill Vrolijk, Benito Dirksz i griffier, ku komishon di investigashon di munisipio Almere. E komishon a risibí informashon balioso tokante e prosesonan i detaye práktiko pa investigashonnan.

Dia 5 di desèmber, miembronan di Konseho Insular ku tabata presente a bishitá munisipio Barendrecht. E bishita aki tabata dirigí pa interkambiá konosementu i pensamentunan, i tambe pa amplia kontakto di griffie.

Dia 6 di desèmber, a tuma lugá un reunion ku komishon di investigashon pa munisipio Den Haag. Durante e reunion aki, a interkambiá diferente perspektivanan riba investigashon nan pa Konseho Insular.

Dia 9 di desèmber, Eilandsraad a bishitá e “Raad van State”. E bishita aki tabata un oportunidat pa interkambiá idea riba e ròl di Raad van State den prosesonan di demokrasia i diskutí temanan ku ta trata Boneiru. Mes dia, e miembronan di Konseho Insular a bishitá e minister plenipotensiario di Aruba, sr. J. Thijsen, na Arubahuis. E enkuentro aki a tabata pa dialogá tokante representashon di komunidat Karibense na Hulanda i sirbi komo preparashon pa un posibel representashon di e islanan BES na Hulanda.

Ademas, tabatin reunionnan entre e islanan BES pa planifiká e siguiente kumbre BES i tambe kòmbersá tokante e diferente tópiko nan ku ta trata e tres islanan.

Kongreso i gala

Miembronan di Konseho Insular i griffie lo partisipá tambe na un kongreso di tres dia na Nieuwspoort, ku temanan importante manera eksistensia digno i kuestionnan di demokrasia. Komo último, e delegashon lo asistí na un gala pa selebrashon di 70 aña di Statuto di Reino Hulandes, pues un bon oportunidat pa krea mas kontakto ku representante nan i diferente persona nan importante pa nos isla.