ORANJESTAD – Un moshon pa ‘retirá sosten’, presentá pa konsehal di PLP Rechelline Leerdam ku a keda aprobá ku dos voto a fabor i un kontra, a kondusí na e despidida di diputado Arlene Spanner-Schmidt djaweps atardi. 

Durante e reunion di konseho insular, tur kuater miembro presente a duna nan opinion. Konsehal Clyde van Putten (PLP) a sostené e moshon pa motibu di falta di resultado tangibel di e konseho ejekutivo. 

Konsehal Glenn Schmidt (tambe PLP) sin embargo tabata hopi malkontentu ku e moshon di deskonfiansa a insistí pa buska otro solushon huntu ku Spanner-Schmidt. Konsehal di oposishon Raquel Spanner-Carty (DP) tambe a laga sa ku e tabata haña e situashon lamentabel, i a sali for di e reunion promé ku e votashon a tuma lugá. “Mi no a vota pa bo nombramentu, pero no lo vota pa bo retiro tampoko,” Spanner-Carty a bisa den direkshon di e diputado.

Den un entrevista ku ABC Online Media djaweps anochi, Leerdam a splika ku malkontentu ku e funshonamentu di e Kolegio Ehekutivo e motibu prinsipal pa retirá e sosten. E a enfatisá e nesesidat di e intervenshon pa logra un mihó gobièrnu pa e isla.

No muchu kla

Ainda no ta muchu kla pakiko e malkontentu den PLP ku e gobièrnu insular tin konsekuensha solamente pa Spanner-Schmidt i no pa su kolega diputado Reuben Merkman. Awor ta di warda wak kiko e akontesimentunan di djaweps lo tin pa e stabilidat polítiko na St. Eustatius.