KRALENDIJK- Despues di un tempu basta largu, ku tabata tin diferente vakatura den ofisina di Sekretario di Entitat Públiko Boneiru (EPB) ta kompletu atrobe. 

EPB pa basta tempu a keda sin sekretario, despues ku Nereida Gonzalez a asumí e funshon di Kwartiermaakster Overheidsdeelnemingen na Bonaire Holding. Na promé instante e sekretario di Entidat Públiko di Saba, Tim Muller, a solisitá na Boneiru i de echo a wòrdu tumá pa e funshon. Sin embargo, e nombramentu a tuma lugá nèt den periodo mas severo di Covid-19. Esaki a pone ku pa un tempu basta largu, Muller no por a biaha pa Boneiru. 

Muller den e tempu ei a re-evaluá su posishon i a disidí pa keda na Saba. “Mi no ta sinti ku mi por bandoná Saba den un momentu asina difísil”, Muller a bisa e tempu ei, motivando su desishon.

Pelk

Despues di un prosedura nobo di reklutashon, EPB a skohe i nombra Wendy Pelk. Komo su asistente a nombra, algun tempu pasá, Christopher Frans. Awor a nombra e di dos asistente den persona di Roxanne Francees, ku te ku resientemente tabata e mènedjer di rekurso humano na Telbo. 

E ofisina di sekretrio ta hunga un ròl hopi importante den organisashon di EPB. E sekretario ta e amtenar mas haltu den hinte re organisashon.