KRALENDIJK – E evento anual “Olimpiada pa Grandinan” lo tuma lugá riba 29 di yüni 2024 den Sporthal na Indebon. E evento spesial aki, organisá pa Entidat Públiko Boneiru i Instituto di Deporte Boneriano (Indebon), ta un selebrashon pa grandinan di Boneiru i ta enfatisá nan ròl den komunidat.

E dia ta kuminsá 8’or ku yegada di e grandinan, sigui pa un parada 08.15 di mainta. Pa 08.30 lo sende e vlam olímpiko. Despues di un desayuno huntu pa 9’or, e aktividatnan di deporte i weganan ta kuminsá 10’or. Esakinan lo sigui te ku lùnch 12’or di mèrdia i ta reanudá nan 1.30 di mèrdia. Entrega di premio ta tuma lugá 2.30, siguí pa un aktuashon di Foyan Boys 3’or. Lo klousurá e dia ofisialmente 5’or di atardi.

E aña aki e evento ta dediká na Chio Semeleer i Willy Piar, komo homenahe na nan kontribushon na e komunidat di Boneiru. E tema di e dia: ‘Laga nos mira ku nos grandinan tambe ta konta’, ta enfatisá e importansia di grandinan na Boneiru.