KRALENDIJK- Den siman tras di lomba por a ripará un moveshon poko straño di parti di Selibon, kaminda ku e kompania di gobièrnu a habri un página di Feisbuk nobo, ku yama ‘Selibon Pa Bo’. Segun deskripshon di e página ku a habri dia 25 di ougùstùs, ta trata di “Selibon NV su página pa informa bo di e kosnan ofisial”.

E deskripshon aki ta lanta vários interogante. Si ‘Selibon Pa Bo’ ta e página di Feisbuk pa informa bo di kosnan ofisial, esaki ta impliká outomátikamente ku e otro página di Feisbuk, ku nòmber Selibon N.V. ta kontené ‘informashonnnan no-ofisial’? O sea: Ora nos mira un publikashon riba página Selibon N.V. mihó nos no pone muchu atenshon na dje, pasombra no por garantisá ku ta trata di ‘kosnan ofisial’?

Nos ta komprondé ku Selibon últimamente ta bou di hopi preshon i tambe ta sufri bou di hopi krítika riba medionan sosial, pa loke ta su gerensia i su maneho. Den e kuadro ei  kisas ta lógiko, ku e kompania ta buska moda di kontratá sierto eksperto ora ta trata di prensa i komunikashon.

Pero e kompania, ku ta un kompania di gobièrnu i dor di esei un kompania ku mester tuma na serio, mester perkurá sí ku e ayudo ku e ta buska no ponele sali di panchi bai kai den kandela.

Loke na mi opinion Selibon ku su página nobo ta i lo kousa, ta ku niun hende no ta mira su página di Feisbuk prinsipal komo algu ku por konfia òf ku tin informashon di balor. Esaki lógikamente por kousa daño serio na reputashon di e kompania, ora ta traha di komunikashon via medionan sosial.

Na Hulandes tin un dicho bunita: ‘Bezint eer gij begint’. O sea: Sòpi purá ta sali salu. Personalmente mi ta kere ku lo ta bon pa Selibon reflehá un poko mas si di berdat nan ke sigui riba e kaminda aki ku e moveshon straño aki ku por afektá nan imagen komo kompania serio i di nivel.