KRALENDIJK- Konseho ehekutivo ta finalizando un plan konkreto pa mehorá servisio na departamento di Registro Sivíl. 

Un lista di medidanan konkreto pa mehorá servisio supstansialmente, partikularmente pa eliminá e tardanza den dunamentu di servicio, aktualmente ta ser studiá pa konseho ehekutivo. 

“E meta final ta minimalisá tempu di espera, pa esnan ku bishitá e servisio aki. Nos ke yega na e punto kaminda ku hende ku ta yega Registro Sivíl por wòrdu atendé mesora, sin ku mester para den rei, i sin ku tin mester di tènt pa hende sinta warda nan turno”, asina Abraham a splika durante konferensia di prensa semanan di Gobièrnu.

Abraham a menshoná ku sin dunda lo mester bai hasi tambe sierto invershon, di moda ku lo por traha mas eficiente na e departamento.  

Smail

Abraham a enfatisá, manera el a hasi anteriormente, ku e retraso den e servisio no ta debí na un falta di esfuerso di parti di e personal di e departamento. “Al kontrario, e empleadonan ta dunando nan máksimo pa atendé tur hende ku un smail riba nan kara, ounke sea ku e situashon na e departamento no ta esun mihó”.