KRALENDIJK – Den di siman tras di lomba, esnan ku sa kana banda di e ruta bieu pa kaminda turista (toeristenweg) pasando anterior kas di Hugo Gerharts na Hato a keda sorprendé ku un bòrchi di ‘Prikichi Reserve’, ku ta bisa di lo ke mantené naturalesa importante na e isla en e área konserní.

E tereno ta  situá entre e kaminda bieu pa bai e kainda turístiko kant’’i laman i kaminda pa bai Sabadeco. Ya pa algún tempu por nota ku a kuminsá rosa sierto tereno den e área. Esaki a pone hopi hende pensa ku lo ta bai tin konstrukshon den e área aki. 

Sinembargo, ta parse awor ku tin tambe algu bon notisia den e plan pa desaryoyo di e tereno. Segun e bòrchi a pone resientemente, lo tin e intenshon di preservá tambe parti di e tereno en kestion pa naturalesa.

“Algu individuo k uta pensa di forma similar a bin hunto pa protehá e tereno i kosta aki pa protehá su flora i fauna lokal.”, asina por lesa riba e bòrchi, pero tambe riba e wepsait www.prikichibonaire.com . Ta sigui splika, entre otro, ku a sera e tereno pa tene kabrito i otro animal ku ta kome mata i palo afó di manera ku esakinan por sigui krese. 

“Disfrutá di e kosta natural i di e mondi seku ku tin aki. Limitá bo mes na tumamentu di foto i laga bo pasonan marká den e santu kanti bich”, por sigui lesa riba e wèpsait.

Tiki informashon

Mester bisa ku e informashon riba e website ainda ta masha tiki i no mashá spesífiko. No ta keda kla ken presis ta e “individuonan ku ta pensá similar” ku ta tras di e inisiativa. Tampoko ta muchu kla ainda kua parti di e tereno lo ser protehá i kua no. E teksto ta parse di suherí  sin embargo ku kosta den e área lo  keda habri pa tur hende ku kier kaná of bai kant’i awa einan.